Мұнайлыда Наурыз мерекесіне орай жүрмелі концерт өтті

Мұнайлы ауданының халық көп шоғырланатын жерлерінде Ұлыстың ұлы күні Наурыз мерекесіне орай жүрмелі концерт өтті, - деп хабарлайды mangystaumedia.kz Мұнайлы ауданы әкімінің баспасөз қызметіне сілтеме жасап.

Мерекелік шара аудан әкімдігінің ұлттық мейрамды тойлауға арналған іс-шара жоспарына сай ұйымдастырылды. Көпшілік алдында Фариза Оңғарсынова атындағы мәдениет үйінің өнерпаздары ән мен биден шашу шашты. Тұрғындарға ұлттық тағамдар ұсынылды.

-Бұл біздің ең қасиетті, қастерлі мерекеміз. Осы орайда аудан тұрғындарының ең көп жиналатын орындары ХҚКО-да және Маңғыстау ауылындағы “Рахат” сауда орталығында жүрмелі концерт ұсындық. Дәл осындай жүрмелі концерт 23 наурыз күні Басқұдық ауылындағы “Басқұдық” сауда орталығында да өтеді,- деді Мұнайлы ауданы әкімінің орынбасары Ержан Күмісқалиев.

Мұнайлылықтар биыл Наурыз мейрамын ерекше көңіл күйде қарсы алуда.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.