Бұдан былай халық жаңа қонысының құрылысын үйден шықпай-ақ бақылай алады. Елдегі бүкіл құрылыс компаниясының жұмыс барысы Е-Qurylys бірыңғай ақпараттық жүйесі арқылы қадағаланбақ. Бұл туралы Индустрия және инфрақұрылымдық даму министрі Бейбіт Атамқұлов бүгін үкімет отырысында айтты, - деп хабарлайды mangystaumedia.kz.
Ақпараттық жүйе келесі жылдың жартыжылдығында толықтай іске қосылады деп жоспарланып отыр. Халық болашақ баспанасына қандай құрылыс материалдары қолданылатынын, олардың құнын да көретін болады.
Сондай-ақ, мемлекеттік тапсырыс бойынша салынып жатқан нысандардың да бүкіл дерегі "Е-Qurylys" жүйесімен қадағаланбақ. Яғни, барлық төлем ондағы арнайы "blockchain" платформасы арқылы жасалады. Нәтижесінде бюджеттен жұмсалған қаражаттың есебін көруге болады. Осылайша, Бейбіт Атамқұлов құрылыс саласында ашықтық болады деп сендіріп отыр.
"Е-Qurylys" үйдің шұңқырын қазудан бастап пайдалануға бергенге дейін құрылыс процесін бақылауға мүмкіндік береді. Қабылданып жатқан шаралар бюрократияны төмендетеді және құжат рәсімдеуді оңтайландырады, - деді ҚР Индустрия және инфрақұрылымдық даму министрі Бейбіт Атамқұлов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
