Бір ауылдың тұрғындары Маңғыстауға 30 тонна шөп жіберді - Атырауда

Атырау облысындағы Мақаш ауылдық округінің тұрғындары Маңғыстау облысына 30 тонна орама шөп жіберді, деп хабарлайды mangystaumedia.kz сайты ҚазАқпаратқа сілтеме жасап.

Мақаш – Ресеймен шекарада орналасқан Құрманғазы ауданындағы ауылдық округ. Мұнда 3 мыңға жуық тұрғын бар. Ауыл тұрғындары Маңғыстау облысына көмек көрсетуге бастама көтерді.

«Атырау мен Маңғыстау – ежелден қоңсы қонған, төскейде малы қосылған өңірлер. Бұрын бір облыстың құрамында да болды. Табиғаты да, экономикасы да бір-біріне ұқсас. Алайда, биыл көршілес Маңғыстаудағы қуаншылық төрт түлікке қиын болып тұр. Бұл біздің де жанымызға батты. Сол себептен, біздің ауылдың азаматтары маңғыстаулықтарға көмек ретінде 30 тонна орама шөп жіберуге бастама көтерген еді. Біздің бұл бастамамызға ауданның, ауылдық округтің әкімдері қолдау білдірді», - дейді ауыл тұрғыны Жеңіс Әбілхайыров.

Оның айтуынша, шөп дайындауға Мақаш ауылдық округінің Жалғас Симон мен Есболат Құбашев бастаған 40-тан астам тұрғыны, «Мақаш» өндірістік кооперативі, үш шаруа қожалығы атсалысқан. Олар 25 күнде әрқайсысының салмағы 300 келіні құрайтын 100 орама шөп дайындап, көрші облысқа жіберді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.