Жанарбек Бақтыбаев Қазақстан полициясы күнімен құттықтады

Құрметті әріптестер! Қадірлі ардагерлер!

Сіздерді кәсіби мерекеміз - Қазақстан полициясы күнімен шын жүректен құттықтаймын!

Ішкі істер органдары - мемлекеттік биліктің қоғамда құқық тәртібін, азаматтардың қауіпсіздігін қамтамасыз ететін маңызды құрылымдарының бірі. Сақшылардың кәсіби қызметі зор жауапкершілігімен, тәуекелге бел бууымен ерекше құнды. Қазақстан дербес мемлекет болып, тәуелсіздігін жариялаған сәттен бастап оның тыныштығын қорғауға берік ден қойылып келеді. Осынау қырағы мамандықты таңдаған жастар да елінің алдындағы борышын сезінетіні сөзсіз.

Полициядағы қызмет — кез келген қоғам үшін аса қажет, іске адалдық пен қайсарлықты талап ететін қауіпті, жауапты жұмыс.

Қызметтік міндеттерін атқару кезінде қаншама әріптестеріміз қаза тапты. Олардың батырлығы мен еліне, халқына деген адалдығы мәңгілік жадымызда. Олар өздерінің парызы мен антына өмірінің соңына дейін адал болып қалды.

Бұл күні мен ардагерлерімізге зор ризашылығымды білдіргім келеді. Бүгінде олар жас қызметкерлердің тәрбиесі мен қалыптасуына үлкен үлес қосуда, қызметтің бай тәжірибесі мен үздік дәстүрлерін беруде, қаза тапқандардың отбасыларына жан-жақты қолдау көрсетуде. Біз үшін бұл шексіз бағалы іс.

Құрметті әріптестер, Сіздердің отбасы мүшелеріңізге жылы лебіздеріңізді жеткізулеріңізді сұраймын. Біздің барлық қызметтік жетістіктеріміз - бұл олардың еңбегі, олардың қолдауы мен түсінігі.

Маңғыстау облысы Полиция департаментінің алдында ауқымды мемлекеттік міндеттер тұр. Олардың барлығы сапалы әрі уақтылы орындалатынына сенімдімін. Өйткені әрқайсымыз үшін құқықтық тәртіп пен заңдылықты қорғау – бұл жай ғана жұмыс емес, бүкіл өмірімізді арнайтын ісіміз.

Ізгі тілекпен, МО Полиция департаментінің бастығы полиция генерал-майоры Жанарбек Бақтыбаев

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.