2021 жылғы 1 қаңтардан бастап зейнетақы және әлеуметтік төлемдердің мөлшерін арттыру туралы

«2021-2023 жылдарға арналған республикалық бюджет туралы» Қазақстан Республикасының Заңына сәйкес 2021 жылғы 1 қаңтардан бастап мынадай көрсеткіштер белгіленген:

Айлық есептік көрсеткіш мөлшері (АЕК) -2 917 теңге;

Зейнетақының ең төмен мөлшері – 43 272 теңге;

Мемлекеттік базалық зейнетақы төлемінің ең төмен мөлшері – 18 524 тенге;

Ең төмен күнкөріс деңгейінің мөлшері (КД) -34 302 теңге.

Ең төменгі жалақы мөлшері 42 500 теңгені құрайды.

2021 жылғы 1 қаңтардан бастап жасына байланысты және еңбек сіңірген жылдары үшінзейнетақы төлемдерінің мөлшері алатын зейнетақы төлемдерінің мөлшерінен 7% арттыру жүргізілді.

2021 жылда жаңадан тағайындалатын жасына байланысты зейнетақы төлемдерінің мөлшерін есептеу үшін ескерілетін ең жоғары табыс айлық есептік көрсеткіштің 46 еселенген мөлшерінен аспауға тиіс (134 182 теңге).

2021 жылғы 1 қаңтардан бастап мемлекеттік базалық зейнетақы төлемінің мөлшері ең төменгі күнкөріс деңгейі шамасының ұлғаюына байланысты арттырылды.

Мемлекеттік базалық зейнетақы төлемінің мөлшері 2021 жылғы 1 қаңтардан бастап «Қазақстан Республикасында зейнетақымен қамсыздандыру туралы» Қазақстан Республикасы Заңының 4-бабына сәйкес КД жаңа мөлшеріне пайыздық арақатынаста белгіленеді.

Мемлекеттiк әлеуметтiк жәрдемақылардың мөлшері, соның ішінде медициналық-әлеуметтік мекемелерде (ұйымдарда) тұратын және түзету мекемелеріндегі тұлғаларға «Қазақстан Республикасында мүгедектiгi бойынша және асыраушысынан айырылу жағдайы бойынша берiлетiн мемлекеттiк әлеуметтiк жәрдемақылар туралы» Қазақстан Республикасының 1997 жылғы 16 маусымдағы N 126 Заңының 12 және 16 баптарында көрсетілген мөлшерде белгіленеді және ең төменгі күнкөріс деңгейі ұлғаюына байланысты арттырылады.

№1 және №2 тізімдер бойынша мемлекеттік арнайы жәрдемақылардың, бала тууға байланысты біржолғы мемлекеттік жәрдемақы, бала бір жасқа толғанға дейін оның күтіміне байланысты мемлекеттік жәрдемақы, арнаулы мемлекеттік жәрдемақылар, "Алтын алқа", "Күміс алқа" алқаларымен наградталған немесе бұрын "Батыр ана" атағын алған, І және ІІ дәрежелі "Ана даңқы" ордендерімен наградталған көп балалы аналарға төленетін ай сайынғы мемлекеттік жәрдемақы,бірге тұратын төрт және одан көп кәмелетке толмаған баласы, оның ішінде кәмелеттік жасқа толғаннан кейін білім беру ұйымдарын бітіретін уақытқа дейін (бірақ жиырма үш жасқа толғанға дейін) орта, техникалық және кәсіптік, орта білімнен кейінгі, жоғары және (немесе) жоғары оқу орнынан кейінгі білім беру ұйымдарында күндізгі оқу нысаны бойынша білім алатын балалары бар көпбалалы отбасыларға төленетін ай сайынғы мемлекеттік жәрдемақы, сондай-ақ Семей ядролық сынақ полигонындағы ядролық сынақтардың салдарынан зардап шеккен азаматтарға және жаппай саяси қуғын-сүргін құрбандарына тағайындалған, бірақ төленбеген біржолғы ақшалай өтемақылардың мөлшері 2021 жылғы 1 қаңтардан бастап АЕК мөлшерінің көбеюіне байланысты арттырылды.

Мүгедек баланы тәрбиелеп отырған ата-анасына (қамқоршысына, қорғаншысына) және бала кезінен бірінші топтағы мүгедекке күтімді жүзеге асыратын адамға төленетін мемлекеттік жәрдемақы мөлшерлері 2021 жылғы 1 қаңтардан бастап ең төменгі күнкөріс деңгейі ұлғаюына байланысты арттырылды.

Бала туылғанда берілетін біржолғы мемлекеттік жәрдемақы мөлшері төртінші балаға дейін 110 846 (38*АЕК) теңге, ал төртінші баладан жоғары 183 771 (63*АЕК) теңгеге дейін, сондай-ақ бала бір жасқа толғанға дейін күтіміне берілетін ай сайын төленетін жәрдемақы мөлшері:

бірінші балаға-16 802 (5,76 АЕК) теңге;

екінші балаға- 19 865 (6,81 АЕК) теңге;

үшінші балаға- 22 899 (7,85 АЕК) теңге;

төртінші балаға- 25962 (8,90 АЕК) теңгені құрайды.

Сондай-ақ, 2021 жылдың 1 қаңтарынан бастап Мемлекеттік әлеуметтік сақтандыру қорынан төленетін еңбек ету қабілеттілігінен айрылуына байланысты, асыраушысынан айрылуына байланысты әлеуметтік төлемдер мөлшері 5-%-ға арттырылды.

Еңбек, әлеуметтік қорғау және көші-қон комитетінің
Маңғыстау облысы бойынша департаменті