Жаңаөзендік өнерпаздар халықаралық «Аlash star» байқауында топ жарды

Бұл туралы Жаңаөзен қалалық мәдениет және тілдерді дамыту бөлімінің басшысы Ұлбазар Орынбаева хабарлады.

​«Жаңаөзен қаласының өнер ұжымы талай байқауларда жүлделі орындарға ие болып жүр. Төтенше жағдайға қарамастан жетістіктердің жалғасы үзілген емес. Әлемдік додалардың көпшілігі қашықтан ұйымдастырылып, онлайн форматта өткізілуде. Қаламыздың мәдени өмірінде қандай да болсын іс-шаралар назардан тыс қалған емес. Түрлі байқауларда бағын сынап, өз таланттарымен танылып жүрген жас өрендеріміз бен мәдениет қызметкерлеріне барынша қолдау көрсетуге дайынбыз. Жеңімпаздардың жеңісі баршаның қуанышы», - деді Ұлбазар Қыдырбайқызы.

Тамыз айында «Алаш өнер орталығы» бастамасымен халықаралық «ALASH STAR» байқауы өткен болатын. Бағы мен бабы қатар шапқан талантты жастар сайысында Қаракөз Кемерова жетекшілік ететін шертер үйірмесінің оқушылары бірқатар жүлделі орындарға ие болды. «Аспапта ойнау» номинациясы бойынша бас жүлдені Кәусар Рахмедулла, Мадина Рахмедулла, Камила Күнтуарова, Сарбиназ Жанғаберген, Азамат Құрымбай, Маһди Құлматай еншілесе, І дәрежелі дипломға Кәусар Қуандық пен Арай Қадырқожа ие болды. «Асыл Мұра» халықтық фольклорлық ансамблі (Кіші топ) – «Бас жүлдені» жеңіп алды. «Үздік жетекші» құрмет грамотасымен топ жетекшісі Қаракөз Кемерова марапатталды.

«Расымен бұл байқаудың бізге бергені көп болды. Қашықтан өнер көрсетуде біраз тәжірибемізді жетілдірдік. Балаларды бұл байқауға өнер жағынан ғана емес, рухани тұрғыдан да дайындау қажеттігін, экран сыртынан қалай өзінің ішкі сезімдерін көрсете алу керектігін ойға түйдік. Алдағы сайыстарда бұдан да жақсы өнер көрсетуге тырысамыз» - деді жеңімпаздардың жетекшісі Қаракөз Кемерова.

«Өнер» ұжымының халықаралық дәрежеде көрсеткен бұл жетістіктері барша өнер сүйер жұртшылыққа жақсы көңіл-күй сыйлады. Қажырлы қайрат пен тынымсыз еңбектің нәтижесін көрсеткен марапаттаулар тізбегі әлі жалғасады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.