Құрық-Жетібай бағытындағы маңызды жол құрылысы 2024 жылы аяқталады

«Құрық-Жетібай» тас жолын күрделі жөндеу жұмыстарының тең жартысы жасалды, деп хабарлайды mangystaumedia.kz.

Осы бағытта мемлекеттен 6 млрд теңгеден аса қаржы бөлінген. 2021 жылдан бері Қарақия ауданында жүзеге асып жатқан жоба құны 11 млрд теңгеден асады. Қалып тұрған 4 млрд теңгесі келер жылдың бірінші жартыжылдығында игерілмек. Ұзындығы 64 шақырымдық трасса Жетібай елдімекенін Құрық ауылымен жалғайды.
Ең маңыздысы, жөндеу аяқталған соң Өзбекстан мен Ресейден келетін транзит жүктер Ақтауды айналмай, Құрық портына тіке баруға мүмкіндік береді. Өз кезегінде, жүк көліктері 120 шақырым жолды үнемдейді.
Жол салуға Маңғыстауда шығарылған битум, қиыршық тас секілді құрылыс материалдары қолданылады, Жоба құрылысының талаптарға сай жасалуын ұлттық орталық мамандары бақылайды.
«Құрық-Жетібай» жолын диагностикалау жұмыстарын жылжымалы зертхана көмегімен жасаймыз. Арнайы мақсаттағы көлік лазерлі қондырғылармен жабдықталған. Олар өлшемдерді дәл анықтап, жол белгілері мен аялдамалардың дұрыс орналасуын көрсетеді. Егер ақаулық табылса, мердігерге қызметтік хат жазып жолдаймыз. Сәйкесінше, тез арада түзетіледі» - дейді ҚР ИИДМ «Жол активтерінің ұлттық сапа орталығы» мекемесінің инженері Мерей Әлиев.
Жоспар бойынша биыл 40 шақырым жол төселеді. Қалған бөлігі келер жылдың ортасына дейін аяқтау жоспарланған. Құрық ауылынан шығатын айналма жолды салу жұмыстары да осы аралықта бітуі тиіс.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.