Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Tech Orda бағдарламасының жаңа легіне қатысу үшін жеке тұлғалардан өтінім қабылданып жатыр, деп хабарлайды mangystaumedia.kz сайты Цифрлық технологиялар басқармасының баспасөз қызметіне сілтеме жасап.
Бағдарлама Қазақстанның 18 бен 45 жас аралығындағы барлық азаматына ІТ-мамандықтарды тегін игеру мүмкіндігін ұсынады. Әлеуетті студенттердің өтінімдерін қабылдау 31 шілдеге дейін astanahub.com платформасында жүргізіледі.
Astana Hub базасында Қазақстан Республикасының Цифрлық даму, инновациялар және аэроғарыш өнеркәсібі министрлігі бастамасы аясында іске асырылып жатқан Tech Orda бағдарламасы ақпараттық технологиялар саласындағы адами капиталдың дамуына бағытталған. Ол веб-бағдарлама әзірлеу, 3D-дизайн мен 3D AR/VR қосымшалар, бағдарламалық қамтамасыз ету, киберқауіпсіздік пен IoT, жасанды интеллект пен алгоритмдері, мобильді қосымшалар жасауды қоса алғанда, Big Data және GameDev салалары секілді басым секторлардың барлық спектрін қамтиды.
Tech Orda іске қосылғаннан бері жақсы нәтижелерге қол жеткізді. Бағдарламаның 2022 және 2023 жылдардағы нәтижелеріне қарап, оның білікті кадрларды даярлау және елімізде IT бойынша білім беруді дамытуға қосып жатқан сүбелі үлесін байқауға болады. Бүгінде 91 мектеп 6251 студентті оқытты. Бағдарламаға тек үлкен шаһар тұрғындары ғана емес, өңірлерде тұратын адамдар да белсенді қатысуда – IT-мектептердің шамамен 40%-ы және студенттердің 46%-ы әртүрлі аймақтардан. Бағдарлама жетістігін жұмысқа орналасудың жоғары көрсеткіштері де растап отыр: түлектердің 88%-ы жұмысқа орналасып, олардың орташа жалақысы шамамен 600 мың теңгені құрады.
Түлектер Kaspi.kz, Halyk Bank, KPMG, Ernst&Young, Теңізшевройл, ҚазМұнайГаз, Freedom Finance, Kcell, Air Astana, Kolesa Group сияқты ірі компанияларды қоса алғанда, 1079 ұйымнан жұмыс тапты.
Мемлекет басшысы Қазақстан халқына Жолдауында кемінде 100 мың IT-маман даярлау, жас, білімді әрі ынталы кадрларды қалыптастыру қажеттілігіне баса назар аударды. Тапсырмаға сәйкес ҚР ЦДИАӨМ Astana Hub халықаралық технопаркімен бірлесіп, 2021 жылы 20 мың IT-кадр даярлауды көздейтін Tech Orda бағдарламасын іске қосты. Игі бастама аясынба мемлекет қолдауымен әр студентке 600 мың теңге бөлініп, жыл сайын 3 мыңнан астам IT-маман оқыту жоспарланды.
Tech Orda бағдарламасына қосылу үшін astanahub.com порталында мектептер мен курстардың толық тізімі жазылған ІТ-мектептер көрмесі бар. Қосымша ақпаратты таңдалған ІТ-мектепке немесе 1818 телефон нөміріне хабарласып білуге болады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.