Сейсмикалық қауіп бар өңірлерде оқу-жаттығуды жиі өткізу керек — Премьер-Министр

© Ratel.kz

Үкімет отырысында Премьер-Министр Әлихан Смайылов сейсмикалық қауіп бар өңірлерде оқу-жаттығуларды жиірек өткізуді тапсырды, деп хабарлайды mangystaumedia.kz сайты Kazinform агенттігіне сілтеп.

«Азаматтарға мұндай жағдайдағы әрекетінің жүйелі болу керектігін түсіндірген дұрыс. Сейсмикалық қауіп бар өңірлерде оқу-жаттығуларды жиірек өткізу керек деп топшылаймын. Халық әрекеттер алгоритмін тәжірибеде білуі керек», — деді Үкімет басшысы.

Еске салайық, бүгін, қаңтардың 22-сінен 23-іне қараған түні Алматыда бірнеше толқынмен жер сілкінді.
Ресми мәлімет бойынша алғашқы дүмпудің амплитудасы 5 баллға дейін жеткен. Салдарынан үрей бой алдырған тұрғындардың бір бөлігі қаланы тастап шығуға бекінген.

Мұның арты көлік кептелісіне ұласып, жанармай бекеттерінде кезек пайда болған.

Халық арасындағы байбаламды пайдаланып такси бағасын бірнеше есе көтеріп жіберу фактілері де тіркелді.

Эпицентрі Алматыдан оңтүстік-шығысқа қарай 264 шақырым жерде, Қырғызстан мен Қытай шекарасында орналасқан түнгі жер сілкінісі Алматы мен Шымкенттен бөлек, Астанада және Қазақстанның бес облысында сезілген.

Жер сілкінісі кезінде Алматы қаласында 8 адам зардап шекті, бір тұрғынның жағдайы ауыр.
Жарақат алған үш адам тұрғын үйлердің 2 және 3 қабатынан секірген.

24-25 қаңтар күндері Президент Қасым-Жомарт Тоқаев Алматыға барады.

Ұлттық сейсмологиялық бақылаулар мен зерттеулер ғылыми орталығының директоры Дәулет Сәрсенбаев Алматыда жақын уақытта жойқын жер сілкінісі болмайтынын айтты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.