Келесі жылы электр энергиясы қымбаттайды

1 қаңтардан бастап елімізде электр энергиясының бағасы 2 теңгеге қымбаттайды, деп хабарлайды mangystaumedia.kz El.kz ақпарат агенттігіне сілтеме жасап.

«Электр энергетикасы туралы» ҚР Заңының 12-1-бабының 2-тармағына сәйкес 24 энергия өндіруші ұйым (ЭӨҰ) 2024 жылғы 1 қаңтардан бастап электр энергиясын өндіруге арналған шекті тарифті түзетуге өтінім бергені белгілі болды.

ЭӨҰ деректері бойынша, түзету компанияға тәуелді емес шығындардың өсуіне байланысты болып отыр. Атап айтқанда өтінімдерде тасымалдауды ескере отырып, отынға (көмірге, газға) арналған шығындардың өсуі байқалған. Электр энергиясын өндіруге жұмсалатын шығындардың жалпы көлемінде отынға жұмсалатын шығындар шамамен 60%-ды құрайды.

Шекті тарифтердің жобалары сонымен қатар елдегі инфляция деңгейіне сәйкес келетін өндірістік персоналдың жалақысының өсуін ескереді. ЭӨҰ персоналының саны шамамен 50 мың адамды құрайды. Бұл ретте білікті персоналдың тапшылығы 30% -ды құрайды, бұл сектордағы кадрлық тапшылық пен төмен жалақының салдары болып табылады.

Бұдан басқа тарифтің ұлғаюы жөндеу науқанын жүргізу және энергия өндіруші объектілердің тұрақты жұмысын қамтамасыз ету үшін қажетті материалдар мен жабдықтарды сатып алу және тасымалдау құнының өсуіне байланысты.

Берілген өтінімдерге сәйкес Қазақстан бойынша ЭӨҰ шекті тарифтерінің орташа өсуі кВтсағ үшін орта есеппен 2 теңгені құрайды. Қазіргі уақытта аталған өтінімдер қаралып жатыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.