БАҚ өкілдеріне арналған «Еркін сөз - 2024» байқауы өтеді

Қазақстандық БАҚ өкілдері арасында қаржы және қаржылық сауаттылықты арттыру тақырыбында “Еркін сөз”-2024 шығармашылық байқауы өтеді. Байқауды «Түркітілдес журналистер қоры» ҚҚ және “Халық банкі” АҚ серіктестігі ұйымдастырып жатыр, - деп хабарлайды mangystaumedia.kz сайты.

Журналистердің шығармашылық қарымын күшейту және ынталандыру мақсатында өтетін «Еркін сөз» байқауында "Үздік видеосюжет", "Үздік мақала", "Сайттағы үздік мақала" номинациялары сарапқа салынады.

- Байқауға мемлекеттік тілде жазатын және хабар тарататын барлық республикалық, халықаралық және аймақтық БАҚ журналистері қатыса алады. Басты талап - көтерілген тақырып халықтың қаржылық сауатын арттыру тұрғысынан пайдалы болуы шарт. Журналистердің 2023 жылдың 1 қаңтарынан 2024 жылдың 15 қазанына дейін жарияланған немесе эфирге шыққан мақала мен телесюжеті қабылданады. Жеңімпаздар байқау комиссиясының шешімімен анықталады және 1 қараша күні дипломдар мен сыйлықтарды табыстау жоспарланып отыр, - деді «Түркітілдес журналистер қоры» ҚҚ президенті Нәзия Жоямерген.

Айтуынша, БАҚ өкілдерін іріктеу барысында материалдың объективтілігі, кәсіби шеберлігі, мәселенің көтерілуі және оны жан-жақты ашып көрсетуі, материалдар туғызған қоғамдық резонанс пен түйткілдерді шешу жолдары және жұмыстардың шығармашылық толымдығы басшылыққа алынады.

Жарияланымдар түпнұсқа немесе материалдардың ксерокөшірмесі түрінде (басылымның атауы, күні және автормен байланыс жасау мәліметтері толық көрсетіле отырып) және Word нұсқасы ұсынылуы тиіс.

Дыбыстық-визуалды жұмыстар (телевизиялық сюжет) телеарнаның YouTube арнасына жарияланған сілтемесімен ұсынылуы тиіс.

Электрондық БАҚ журналистері (сайт, портал, онлайн газеттер) жарияланған материалдардың көшірмесін интернет-сайтта орналастырылғанын растап, cілтеме және Word форматта мәтіні жолдауы қажет.

Материалдар мемлекеттік тілде қабылданады. Байқауға материалдарды қабылдаудың соңғы күні – 15 қазан, сағат 23:00-ге дейін.

Ұсынылатын материалдарға мыналар қоса беріледі: журналист туралы қысқаша өмірбаяндық ақпарат, журналистің 3х4 см. мөлшеріндегі фотосуреті мен ұялы телефон нөмірі.
Журналист 1 ғана материал ұсынуы тиіс.

Байқаудың ұйымдастыру комитеті - «Түркітілдес журналистер қоры» ҚҚ, Алматы қаласы, 050008, Жароков көшесі, 39 A.

Call centre: + 7702 543 7740 (WhatsApp); электронды пошта: erkinsoz2024@gmail.com.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.