Қазақстан халқы Ассамблеясының XXIX сессиясы өтті

Бүгін Елбасының төрағалығымен Қазақстан халқы Ассамблеясының «Бірліктің, татулық пен келісімнің 30 жылы» атты XXIX сессиясы өтті. Сессияға ел президенті Қасым-Жомарт Тоқаев және 550-ден астам адам онлайн форматта қатысты.

Аталған сессияны облыс әкімдігінде Маңғыстау облысы әкімі Серікбай Трұмовпен бірге өңірлік Ассамблея мүшелері, этномәдени бірлестіктердің төрағалары, қоғам белсенділері және БАҚ өкілдері тыңдады.

Алдымен ҚР Тұңғыш Президенті – Елбасы Нұрсұлтан Назарбаев 1991 жылдың маңызды әрі тарихи жыл екенін атап өтті.

«Биыл Қазақстан Тәуелсіздігінің 30 жылдығын атап өтетін жыл. 1991 жылы еліміздің халқы үшін жаңа дәуірдің басы болды. Бұл – бостандық, ата-бабамыздың тарихи мекенінде еркін өмір сүру, жаңа мемлекет құру, оның тағдыры үшін жауапкершілік алу уақыты болды. Соның барлығын басымыздан кешіріп, көзімізбен көрдік. Енді міне, биыл 30 жылдықты атап өтеміз. 30 жыл бұрын көпұлтты, көпконфессиялы халқымыз еліміздегі бірлікке, бейбітшілік пен келісімге қарай жылжу үшін тағы бір іргелі таңдау жасады», - деді ҚХА-ның ХХІХ сессиясында Елбасы.

Осы таңдаулы қадам елдің ілгерілеуіне, ұлттық дамудың стратегиялық формуласының тиімділігіне, мемлекеттің қолайлы жағдай жасауына серпін берді. Қазіргі елдің қалыптасуына, қуатты әрі тәуелсіз ел болуына мүмкіндік жасады.

«Басты камертон қызметін «Бiз, ортақ тарихи тағдыр бiрiктiрген Қазақстан халқы» деген сөзбен басталатын Конституциямыздың преамбуласы атқара алады. Бұл сөйлемнің мәні өте маңызды. Өйткені Конституцияны жазу барысында оған өте маңызды мән берген едім. Ата заң ұлтына сеніміне немесе тіліне қарамастан барлық отандасымыздың ортақ мүддесін білдіреді. Конституциямыздың 11 бабы мемлекетіміздегі бірлікті, бейбітшілік пен келісімді бекітеді, қорғайды және нығайтады. Елімізде тіліне, дініне, ұлтына байланысты белгілер бойынша қандай да бір кемсітушілікке тыйым салынады», - деді Нұрсұлтан Назарбаев.

ҚХА Төрағасы Нұрсұлтан Назарбаев жиын барысында Қазақстанға қатысты әлем елдерінің сенімі жайлы сөз қозғады. Сонымен қатар мемлекеттік тілдің маңыздылығы, оның біртұтас ел болуға, халықты біріктіретініне назар аударды.

«Қазақ халқы полиэтникалық қоғамды шоғырландыратын интеграциялық процесстердің арқауын қалыптастырды. Бүкіл әлемде солай жасалады, тіл барлығын біріктіреді. Біз еліміздегі этностардың мәдениетін, тілін дамыту үшін қажетті барлық жағдайды қамтамасыз еттік. Соның аясында қазақстандықтар ортақ мақсатымыздың және ортақ ұмтылысымыздың төңірегіне топтасты. Әрқайсысы біздің бірлігімізді, өзара құрметімізді, отаншылдық пен жауапкершілігімізді нығайтуға үлес қосты», - деді ҚХА-ның ХХІХ сессиясында Елбасы.

Отыз жылда елдің әр өңіріндегі жетекші сала өз деңгейінде дамып, өркендеп жатыр. Бұл елдің әлеуетін арттыруға, халықты жұмыспен қамтуға, жан-жақтан туристерді тартуға, экономиканың алға жылжуына өз септігін тигізеді. Осы ретте Елбасы Каспий теңізі жағалауының дамып жатқанын тілге тиек етті. Тіпті алдағы уақытта қазақстандық Ривьера болатынын айтты.

«Біз кәсіпорындар салып, жаңа қала тұрғызып жатырмыз. Каспий теңізінде қазақстандық Ривьера салатын боламыз. Мың адамға арналған бір қонақ үй әлемдегі кез келген қонақ үйден жақсы. Антальядан да жақсы. Тағы осындай 3 кешен салынып, қазақстандық Ривьера тұрғызамыз. Біз мұны пандемия жағдайында да іске асырамыз», - деді Н. Назарбаев.

Сессия соңында тәуелсіз елдің төрінде өмір сүріп, жетістікке жеткен өзге ұлт өкілдері сөз сөйлеп, Елбасыға алғыс айтты. Сонымен қатар бүгін жиын соңында ҚР Тұңғыш Президенті – Елбасы Нұрсұлтан Назарбаев ҚХА төрағасы лауазымынан бас тартып, қызметті мемлекет басшысы Қасым-Жомарт Тоқаевқа тапсырды.

«Ассамблеяны басқару өте жауапты жұмыс. Бұл – үлкен саясат. Сондықтан осы жауапты міндетті жауапкершілікпен атқарамын деп айтқым келеді», - деді ел президенті Қ. Кемелұлы.

Мемлекет басшысы өз сөзінде Елбасының тәуелсіз ел үшін жасаған нақты қадамдарын, жетістік жолындағы саясаты мен реформаларын, парасатты басшы ретінде қабылдаған шешімдерінің маңызды екенін айтты.

Сонымен қатар Қазақстан халқы Ассамблеясы алдында жаңа міндеттер тұрғанын жеткізді.

«Бүкіл қоғамды ұйыстырып, ырыс-ынтымағымызды арттыру аса өзекті мәселе. Біз әрқашан «береке басы бірлікте» деген қағиданы ұстандық. Қазақстан 30 жылдың ішінде халқы тату, жері тыныш, қоғамы тұрақты мемлекетке айналды. Бұл шын мәнінде мақтан тұтарлық жетістік. Сантүрлі ұлттың басын біріктіріп, бір мақсатқа жұмылдыру оңай шаруа емес. Бұл табандылықты талап ететін күрделі жұмыс. Біз сыйластық пен келісімнің, бауырмалық пен өзара құрметтің негізінде еңселі, өркениетті ел болып отырмыз. Бұл әрине, Елбасының арқасы. Мұны әрдайым есте ұстауымыз керек. Әсіресе, коронавирус дерті қыспаққа алған күрделі кезеңде халқымыздың алдында тұрған міндеттерді жүзеге асыру үшін біз бәріміз бір ел, бір ұлт болып жұмылуымыз керек. Ассамблеяның да алдында жаңа міндеттер тұр. Татулық пен келісім саясатын жалғастырып, дамыта түсу баршамыздың ортақ парызымыз. Себебі бүгіндей алмағайып заманда кез келген сынаққа төтеп беру үшін бірлігіміз әрдайым бекем болуға тиіс»,- деп сөзін түйіндеді Қасым-Жомарт Тоқаев.

Қорытындылай келе, Қазақстан халқы Ассамблеясының «Бірліктің, татулық пен келісімнің 30 жылы» атты XXIX сессиясы татулық пен достыққа, жетістік пен жарқын болашаққа, мақсат пен міндетке, алғыс пен келісімге құралған мазмұнды пікірлерге толы болды.

Жұлдызай ҚАЛИЕВА

Суретті түсірген Серік МАЙЕМЕРОВ