Ақтауда облыс әкімдігінде "Спорт турнирлері мен жарыстардың өткізілуіне бақылауды күшейту және балаларды тасымалдау кезінде заңдылықтың сақталуын қадағалау" тақырыбын талқылауға арналған басқосу өтті, деп хабарлайды mangystaumedia.kz.
Облыс әкімінің орынбасары Звира Есбергенованың төрағалығымен өткен жиынға қала, аудан әкімінің әлеуметтік сала жөніндегі орынбасарлары, спорт, білім, денсаулық сақтау, мәдениет, тілдерді дамыту және архив ісі, ішкі саясат басқармасының өкілдері мен облыс әкімінің отбасы мәселелері бойынша кеңесшісі, Бала құқығы жөніндегі уәкіл, облыстағы спорт федерациясы басшылары, полиция департаменті, қала, аудандардағы спорт бөлімдерінің, мекемелерінің, спорт кешендерінің басшылары, әйелдер істері және отбасылық-демографиялық саясат жөніндегі комиссия мүшелері, кәмелетке толмағандар ісі және олардың құқықтарын қорғау жөніндегі комиссияның мүшелері арнайы қатысты.
Таяуда Ақтөбе облысынан Түпқараған ауданына қарасты Ақшұқыр ауылында жеке меншік қор ұйымдастырған футбол турниріне келе жатқан балалар жол апатына ұшырап, 8 адам қаза тапқан болатын. Осыған орай, келеңсіз жайттардың алдын алу мақсатында тиісті ұсыныстар айтылып, дене шынықтыру және спорт басқармасының және өзге де құрылым өкілдерінің баяндамалары тыңдалды.
"Таяуда Ақтөбе облысынан Маңғыстауға келе жатқан балалар мінген көлік жүк көлігіне соғылып, 8 адам мерт болды. Оның ішінде кәмелеттік жасқа толмаған 5 бала бар. Қайғылы жағдай неден шықты? Бұл жарысты жеке қайырымдылық қоры ұйымдастырмақ болған. Бұл туралы спорт басқармасы секілді тиісті орындарға мүлде ескертілмеген. Полиция департаменті балалар мінген көлік жолға шыққанын білмеген. Өңірде спортқа құштар балалар көп. Олардың спорттық жарысқа қатысатын кезде тиісті қауіпсіздігі ескеріліп, арнайы көлікпен бастап жүруге мән беру керек. Жазғы демалыстың өзінде балаларды лагерге апаратын кезде мұндай жағдай ескеріле бермейді", - деді Звира Есбергенова.
Ал облыстық дене шынықтыру және спорт басқармасының басшысы Мақсат Мұқаш бұл жағдайдың аса өзекті екенін айта келе, тиісті тұлғаларға қатысты арнайы шара қолданылатынын жеткізді.
"Оқушылардың спорттағы жетістігінен гөрі олардың қауіпсіздігі аса маңызды. Өздеріңіз білетіндей, Ақшұқыр ауылындағы жекеменшік спорт кешенінде қайырымдылық қоры турнир ұйымдастырған. Осыған қатысуға келе жатқан балалардың қайғылы оқиғасы тіркелді. Биыл мұндай оқиға бірнеше рет елімізде тіркелді. Таяуда Қарағанды облысында көкпаршылар апатқа ұшырап, 2 адам бақилық болды. Олар қыркүйекте Астанада өтетін Дүниежүзілік Көшпенділер ойынына қатысуы тиіс болған еді. Жалпы, Түпқараған ауданында өткен жарыс біздің басқармамен келісуінсіз ұйымдастырылды. Өңірдегі барлық қала, аудандардағы жарыстарды қадағалап отыруға біздің мамандардың толық қауқары жетпейді. Сол салаға жетекшілік ететін әкім орынбасарлары мұндай шараларды тоқтауы тиіс. Басқарманың ұсынысы жергілікті полицияға ұсыныс беріп, келісімсіз жарыс өткізгендерге әкімшілік айыппұл салуға мәжбүрміз. Мұндай жағдайлар жиі тіркелуіне байланысты тиісті тұлғалардың үстінен облыс әкіміне қызметтік хат жазатын боламыз", - деді Мақсат Мұқаш.
Оның айтуынша, Жаңаөзендегі спорт мектебінің дзюдо жаттықтырушысы балаларды жарысқа апара жатып, жол апатына түскен. Көлік басқарған жүргізуші қарсы беттегі көлікке соғылып, адам өлімі тіркелген. Қазіргі уақытта бапкер сот үкімімен екі жарым жылға бас бостандығынан айырылған.
Өз кезегінде Полиция департаментінің өкілі қауіпсіздік шарасын үнемі қаперде болуын айтып, ата-аналар да бала тәрбиесімен бірге олардың қараусыз қалмауына назар аударды. Себебі, өңірде үйде қараусыз қалаған балалардың жазатайым жағдайға ұшырау деректері көбейген. Оның ішінде, суға бату, терезеден құлау, жол апатына ұшырау секілді деректер қатары жиілеген.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
