Ақтауда садақ атудан ашық чемпионат өтті

Ақтауда дәстүрлі садақ ату жарысынан ерлер мен қыздар арасында ашық чемпионат өтті, - деп хабарлайды mangystaumedia.kz.

Ашық чемпионатқа Атырау облысынан, Батыс Қазақстан облысынан және Маңғыстау облысынан 60-қа жуық спортшы келіп, қатысты.

Кеше 50 метр қашықтықтан «Қалқан» нысанасы бойынша қыз келіншектер және ер адамдар арасында жарыс өтті. Қыздар арасындағы жарыста Атырау облысы, Жылыой ауданынан келген Амира Сәрсенбаева бірінші орынды, Назерке Ерікқызы екінші орынды, Батыс Қазақстан облысынан келген Мөлдір Жолдасова үшінші орынды иеленді.

Ал ерлер арасында өткен садақ ату сайысында Батыс Қазақстан облысынан келген Нұрсұлтан Тәжіғалиев бірінші орынды қанжығасына байласа, екінші орынды Жаңаөзендік Жаңаберген Көбенұлы, үшінші орынды Атырау облысынан келген Қайрат Шапабаев алды. Жүлдеге ақшалай сыйлықтар табыс етілді.

Айта кетейік, бүгін командалық жамбы атудан сайыс өтеді.
Жақында Семей қаласында өткен Қазақстан кубогында БҚО командасы мен Маңғыстау командасы финалға өтіп, БҚО жеңіске жеткен болатын. Бүгінгі кездесуде қос команда қайта сайысқа түседі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.