Қалалық мешіт имамы бүлдіршіндерді мерекемен құттықтады

Тәуелсіздік күні қарсаңында Ақтау қалалық Бекет ата мешітінің бас имамы Зиядолла Еміл облыс орталығындағы нөмірі 3 әлеуметтік қызмет көрсету орталығындағы тәрбиеленушілерді мерекемен құттықтады, - деп хабарлайды mangystaumedia.kz сайты.

Ақтаудың бас имамы балғындарға ең ізгі тілектерін арнап, мерекелік тартуларын табыс етті.

- Осындағы балаларға кішкене де болса жылулық көрсетейін деген тілекпен келдік. Балаларға мейіріммен көңіл-күй сыйлап, махаббатты арттыру үшін жасаған амалымыз деп білемін. Діни қызметкердің міндеті тек мешітте намаз оқу емес, қоғамға пайдасы тиер игі істерді жасауға атсалысу, - дейді Ақтау қалалық мешітінің бас имамы Зиядолла Еміл.

Орталықта түрлі ауруға шалдыққан 1,5-18 жас аралығындағы 120 бала бар. Олар қажеттіліктеріне қарай арнаулы әлеуметтік қызмет алады.

Өткен жылдың қорытындысы бойынша бұл орталықта 171 бала қызмет алған. Олардың жартысы орталыққа қатынаса, қалғандары осы жерді тұрақты мекен еткен.

Айта кетейік, 2019 жылы бұл медициналық әлеуметтік мекемені қамтамасыз етуге 336 миллион теңгеге жуық қаражат бөлінген.

Махаббат НҰРЖАНҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.