Биыл 1,5 миллионнан астам адам тегін дәрімен қамтылды

Бұл туралы Baq.kz ақпарат агенттігі хабарлады.

Орталық коммуникация қызметінде өткен брифингте денсаулық сақтау министрі Елжан Біртанов тегін медициналық көмектің кепілдік берілген көлемінің шеңберінде халықты дәрілік заттармен қамтамасыз ету, сондай-ақ, Қазақстан Республикасында фармацевтика саласының жағдайы мен дамуы туралы айтты.

"Өткен жылдың басында Елбасымыз Нұрсұлтан Назарбаев Денсаулық сақтау министрлігіне тегін дәрі-дәрмекпен қамту мәселесін және дәрі-дәрмектердің бағасын реттеу бойынша нақты тапсырма берді. Екінші тапсырма бойынша арнайы заң әзірленді. Ол қазіргі уақытта Парламентте қаралып жатыр, жылдың аяғына дейін шешім қабылданады деп сенеміз", - деді Біртанов.

Сондай-ақ, ол 2019 жылдың қаңтар айынан бастап еліміздегі барлық дәріханадағы дәрі-дәрмектердің бағасын реттеу механизмі енгізілетінін атап өтті.

"Биыл 8 ай ішінде 1,5 миллионнан астам адам тегін дәрімен қамтылды. Жыл соңына дейін 3,5 миллион адам тегін дәрімен қамтылады деп жоспарланған. Түсінікті болуы үшін тағы бір қайталап айта кетейін, тегін дәрі-дәрмектер тізіміне кіретін дәрілер ғана тегін беріледі. Ол емделу үшін қажетті 100% дәрінің 30-ы деп атауға болады. Егер тегін берілетін дәрі-дәрмекті жымқыру не сату сияқты заңсыз жағдай болса, фармация комитетінің жергілікті департаментіне хабарлап айту керек. Ондай жағдайда қажетті әкімшілік немесе құқықтық шешімдер қабылдаймыз", - дейді Елжан Біртанов.