Маңғыстаулық жігіттер әскерге аттанды

Күзгі әскери шақыру науқаны басталды. Биыл Отан алдындағы парызын 600-ден астам маңғыстаулық өтемек. Осыған орай, облыстық әскери комиссариат ғимаратында жас сарбаздарды ҚР Ұлттық қауіпсіздік комитетінің шекара қызметі қатарына, мерзімді әскери қызметке жөнелтуге арналған салтанатты жиын өтті.

Мемлекеттік Гимнмен басталған салтанатты шарада облыстық қорғаныс істері жөніндегі департаментінің бастығы, генерал-майор Еділ Оразов құттықтау сөз алып, жастарға ақ жол тіледі:

- Отан оттанда ыстық. Отанды қорғау - әр азаматтың абыройлы қызметі, азаматтық борышы. Көне заманнан қазақтың ерлері Отанын, жерін, халқын, отбасын жаудан қорғауға дайын болған. Міне, бүгінгі жігіттер де егеменді елімізді абыроймен қорғауда. Отан алдындағы парызыңызды атқарып, офицерлердің әскери бұйрықтарын бұлжытпай орындап, әскери қиыншылықтарды төзімділікпен өткеріп, ел сенімін ақтап, мемлекетіміздің ержүрек қорғаушылары атаныңдар! Отан алдындағы әскери міндетіңізді абыроймен атқарып, аман-есен туған жерлеріңізге қайтып келуіңізді тілеймін! Сіздер кез келген уақытта тәуелсіз елімізге қорған болуға дайын, рухы мықты азамат болуыңыз қажет,-деді ол.

Сондай-ақ ҚР Қарулы күштері ардагерлер кеңесінің төрағасы, полковник Нұрлыбай Қонақбаев, 20/18 әскери бөлімінің өкілі Ақылбек Саматов, ата-аналар жылы лебіздерін білдіріп, жастарға амандық, әскери борышына беріктік, ерлік, сәттілік тіледі. Департамент атынан жас сарбаздарға «Ержүрек» кітабы тарту етілді.

Отан алдындағы қасиетті борышын өтеу үшін Маңғыстау облысының жастары Алматы облысы, Ұйғыр ауданы, Шонжы қаласындағы 25/34 әскери бөлімінде және Ақтау қаласындағы «Жағалау күзеті» 20/18 әскери бөлімінде қызмет етпек.

-Әскери қызметке шығарып салу науқаны желтоқсан айының соңына дейін жалғасады. Олар медициналық тексерістен өтіп, әскерге аттанбас бұрын тыңғылықты әзірленген. Барлығы әскери қызметке дайын. Бүгінде әскери қызметте барлық жағдай жасалған,-деді Маңғыстау облысының қорғаныс істері жөніндегі департамент бастығының орынбасары, әскери қызметшілерді келісімшартпен шақыру бойынша басқарма бастығы Шынболат Ақмұратов.

Ханым ҚУАТ Суреттерді түсірген автор

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.