2023 жылы Универсиада Ш.Есенов университетінде өтеді

Қожа Ахмет Яссауи атындағы Халықаралық қазақ-түрік университетінің ұйымдастыруымен өткен ХІ жазғы универсиаданың жабылу салтанатында Универсиада туы Yessenov University-ге табысталды, - деп хабарлайды mangystaumedia.kz Ш.Есенов атындағы Каспий технологиялар және инжиниринг университетінің баспасөз қызметіне сілтеме жасап.

40 күнге созылған Студенттер Олимпиадасына 60 жоғары оқу орны 30 спорт түрінен сайысқа түсті. Олардың арасында Есенов университеті студенттері де бар. Олар қазақша күрес, грек-рим күресі, дзюдо және кикбоксинг секілді бірнеше спорт түрінен жүлделі орынды қанжығасына байлады.

Келесі ХІІ Республикалық жазғы Универсиада 2023 жылы Ш.Есенов атындағы Каспий технологиялар және инжиниринг университетінде өтеді.

Түрлі халықаралық жарыстарға қатысып, Қазақстанның атын шығарып жүрген, өңірімізден түлеп ұшқан спортшылардың басым бөлігі Есенов университетінің студенттері және түлектері. Жастардың спортқа деген қызығушылығын арттырып, жан-жақты шынығуы үшін университетте 2 жабық спорт зал, 13 ашық спорт алаңы, жүзу бассейні бар спорт кешені жұмыс істейді. Алдағы уақытта 3 мың орындық стадион да салу жоспарланып отыр, - дейді Ш.Есенов атындағы Каспий технологиялар және инжиниринг университетінің баспасөз қызметінің басшысы Жансая Бердімұратқызы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.