Маңғыстауда садақ атудан республикалық ашық турнир өтті

«Mangystau Nauryz Fest - 2021» жастар фестивалі аясында өңірде алғаш рет дәстүрлі садақ атудан жасөспірімдер мен ересектер арасында республикалық ашық турнир өтті, - деп хабарлайды mangystaumedia.kz сайты.

Турнир садақ ату федерациясымен бірлесе ұйымдастырылды.

Додаға 14 облыстан 50-ге жуық садақшы келді.Жарыстың бірінші кезеңінде жасөспірімдер мен қыздар 6 оқтан бес айналымда 50 метр қашықтықта, ал, ерлер 2 айналымды 70 метр қашықтықта нысананы дәлдеді. Құралайды көзге атан қатысушылар финалға жолдама алды.

«Жастардың бұл бастамасы өте құптарлық. Алдағы уақытта республикалық деңгейде шаралар көптеп ұйымдастырылып, жас мергеншілер өзара тәжірибе алмасса деймін. Жас буынды отансүйгіштікке, патриоттық рухқа тәрбиелеу маңызды. Біз қазіргі таңда дәстүрлі садақ атудың беделі мен рейтингін көтеруді және оны әлемдік деңгейдегі негізгі спорт түріне айналдыруды көздеп отырмыз», - дейді садақ ату спортының халықаралық төрешісі Мұхтархан Абаған.

Бүгінде Маңғыстау облысының бірнеше садақ ату үйірмелерінде 100-ге жуық садақшы жаттығады.

Ұлттық ойынды жандандыру арқылы қазақы дәстүрді дәріптеп, дамытуды мұрат тұтқан мергендер жарысының нәтижесінде жасөспірімдер арасында:

1 - орын: Манақбай Бекарыс, (Алматы облысы);

2 - орын: Жолдасбек Саийдрохман, (Жаңаөзен қаласы);

3 - орын: Жолдасбай Асхат (Жаңаөзен қаласы)

Ерлер арасында:

1 - орын: Сесигюзел Али (Атырау облысы);

2 - орын: Ахмедов Диас (Нұр-Сұлтан қаласы);

3 - орын: Балтабек Ахмади (Нұр-Сұлтан қаласы)

Қыздар арасында:

1 - орын: Тлепберген Айым (Нұр-Сұлтан қаласы);

2 - орын: Аппазова Аяулым (Нұр-Сұлтан қаласы);

3 - орын: Асқарбаева Асылым (Жаңаөзен қаласы) иеленді.

Жүлдегерлерге бағалы сыйлықтар мен Алғыс хаттар табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.