Жетібай ауылы №8 мектебінің технология пәнінің мұғалімі Айболат Бабаназаров ағаштан қолөнер бұйымдарын жасайды. Бұл туралы мектеп директорының оқу ісі жөніндегі орынбасары Алма Мұханова мәлім етті.
Айболат Бабаназаров ағаштан бұйым жасаумен бала кезінен айналысқан. 2002 жылдан бері ауыл тұрғындарының тапсырысымен үй жиһаздарын жасап жүр, деп хабарлайды МО ҚКО.
«2015 жылы мектепке технология пәнінің мұғалімі ретінде жұмысқа орналасқаннан кейін ағаштан түрлі қолөнер бұйымдарын жасауды қолға алдым. Қазіргі таңда өнердің осы түріне шәкірттерімді де үйретіп жүрмін», - деді ол.
Мектеп директорының оқу ісі жөніндегі орынбасары Алма Мұханованың айтуынша, Айболат «Рухани жаңғыру» бағдарламасы аясында ұйымдастырылған «Мерейлі отбасы», «Үлгілі педагог» сайыстарына оқушылар апарып, жүлделі орындарға ие болды.
«Айболат - өзінің қолынан келетін өнерін шәкірттеріне үйретуден жалықпайтын азамат. Оның шәкірті Ерсайын Бауыржан іске жарамсыз болып қалған қабырға сағатын өңдеп, домбыра нақышында және пластикалық қалдықтардан зымыран мүсінін жасады. Айболат теория мен практикалық дәрістерді ұштастыра біледі», - деді Алма Мұқанова.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
