Мұнай-газ кешенінің ардагері Артелбек Жакулаевтың құрметіне ескерткіш тақта орнатылды

Бүгін Ақтау қаласы мұнай-газ кешенінің ардагері Артелбек Жакулаевтың құрметіне 8 шағынаудан 11 үйге ескерткіш тақта орнатылды, деп хабарлайды mangystaumedia.kz сайты.

Жиынға «Қаражанбасмұнай» АҚ кадр және әлеуметтік мәселелер жөніндегі вице-президенті Асқар Рзаханов, Артелбек Жакулаевтың жары, туған-туыстары, замандастары қатысты.

Жиында сөз алған Асқар Рзаханов өз қызметін қатардағы жүргізушіден бастап, үлкен мекеменің басшысы болған Артелбек ағамыз қашан да есімізде деді. Биыл "Қаражанбас" кен орнынан мұнай алынып, шығарыла бастағанына 40 жыл толып отыр. Алайда қазіргі жағдайларға байланысты ойластырылған шаралар тоқтап тұр. Маңғыстаудың мұнай-газ кешенін игеруге зор үлес қосқан азаматтарды еске алып жүру үшін көптеген шаралар өткізу ойда бар. Кітап шығару да жоспарда бар. Осындай ерен еңбектерімен қазір елімізді үлкен жағдайларға жетуге себепкер болған ағаларымыз әрдайым есте болады. Осы тақтаны ашуға үлес қосқан "Қаражанбас" мекемесінің басшылығы мен ардагерлер кеңесіне көп рахмет. Осындай шаралардың барлығы өсіп келе жатқан ұрпаққа үлкен үлгі", деді ол.

Жиын соңында сөз алған Артелбек Жакулаевтың жары ескерткіш тақтаны орнатуға мұрындық болғандар мен жиналғандарға өзінің алғыс-тілегін жеткізді.

Айта кетейік, мұнай-газ кешенінің ардагері, ел ағасы Артелбек Жакулаев 1939 жылы 12 наурызда Атырау облысы, Жылой ауданында дүниеге келген. 1955 жылы орта мектепті бітірген соң Форт-Шевченко қаласында жүргізуші-жөндеуші болып еңбек жолын бастады.

1959-1962 жылдар аралығында Қостанай қаласындағы автотранспорт техникумында білім алып, 1973-1978 жылдары Ташкент халық шаруашылығы институтында оқыды.

1963-1967 жылдары «Маңғышлақмұнайбарлау» мекемесінде жөндеуші-механик болып еңбек етті.

1967-1985 жылдары «Маңғышлақмұнайбарлау» мекемесінің автоколонна бастығы, бас инженері, технологиялық көлік басқармасы және транспорт қызметі бастығының орынбасары лауазымдарында болды. Осы мекемеле қоғамдық негізде Партия бюросының мүшесі, халықтық бақылау тобының төрағасы болып жұмыс істеді.

1982-1984 жылдары «Бозашы» технологиялық көлік басқармасы басшысы ретінде табысты еңбек етті.

1988 жылы баламалы сайлауда «Союзтермнефть» яғни, қазіргі «Қаражанбасмұнай» АҚ мекемесінің басшысы қызметіне таңдалып, абыройлы еңбек етті. Атырау облыстық Халық депутаттарының кеңесі мүшесі болды.

М. Керімқұл

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.