Ақтауда жазасын өтеуші «жасыл экономиканы» дамытуға арналған екі жоба ойлап тапты

Ақтаудағы қауіпсіздігі барынша төмен ГМ-172/8 түзету мекемесінде жазасын өтеуші «жасыл экономиканы» дамытуға арналған екі жоба әзірледі. Сегіз ай бұрын ол авторлық құқықты алу үшін патенттік бюроға өтініш берген. Бұл туралы Маңғыстау облысы бойынша қылмыстық-атқару жүйесі департаментінің баспасөз қызметі хабарлайды.

Жазасын өтеуші Мәлік адам ағзасын қысқа мерзімде оттегімен қанықтыруға арналған құрылғы және автокөліктерден бөлінген газды сүзуге арналған құрылғы ойлап тапты. Жобаны әзірлеуші серіктесінің көмегімен Мәскеу авиациялық институтының инженерлерімен байланысқа шығады. Осылайша, ресейліктер Мәліктің жобасын жүзеге асыруға қол ұшын берген.

«Бұрын ойыма бір идея келсе, оны жазып қоятынмын. Қазір идеяларымды жүзеге асыруға көмектесетін әріптесім бар. Ол біздің жобаны дамытуға көмектесетін адамдар іздей бастады. Нәтижесінде алғашқы концепциямызды әзірлеуге Мәскеу авиациялық институтының инженерлері көмектесті. Олардың қолдауына алғысымды білдіремін», - деді ол.

Мәліктің айтуынша, адам ағзасын қысқа мерзімде оттегімен қанықтыруға арналған құрылғыны жасау туралы идея алғаш рет облыстағы ГМ-172/6 қатаң режимдегі түзету мекемесінде жүргенде келген.

«2014 жылы ұрлық жасағаным үшін сотталдым. Қылмыс жасауға итермелеген есірткіге құмарлығым еді. Сол кезде героинге тәуелді едім. Қазір есірткіге тәуелділігімді жеңдім», - деді ол.

Ведомствоның хабарлауынша, Мәліктің өмірге деген көзқарасы өзгерген. Ол жазасы жеңілдетілген кейін өз идеяларын жүзеге асыра бастаған. Қазір ол колониядағы өсімдіктерді күтумен айналысады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.