Форт-Шевченкода балалар ойын алаңы мен жағажай пайдалануға берілді

Форт-Шевченко қаласында жаңа балалар ойын алаңдары мен жағажай пайдалануға беріледі. Бұл туралы Форт-Шевченко қаласының әкімі Өсер Тлепов мәлімдеді, - деп хабарлайды mangystaumedia.kz сайты.

Оның айтуынша, қала халқының саны жыл сайын өсіп жатыр. Өткен жылмен салыстырғанда 397 адамға өсіп, 7 666 адамға жетті. Сәйкесінше, жеке тұрғын үйлер саны артуда. Бұл өсімдер жаңа қажеттіліктерді тудырып отыр.

«Форт-Шевченко қаласының Досан Тәжіұлы және Жамбыл Жабаев көшесіне балалар ойын алаңының құрылысы бой көтерсе, «Оңдасын Строй» ЖШС мекемесінің демеушілігімен Жаңа Кетік шағын ауданының V кварталында балалар ойын алаңы салынып жатыр», - деді Өсер Тлепов.

Бұдан бөлек Форт-Шевченко қаласының теңіз жағалауын абаттандыру жұмыстары басталды.

Осы мақсатта қала тұрғындары мен қонақтарына арналған жарақтандырылған орындар жасалып жатыр. Жағажайда шағын футбол алаңы, воркаут алаңы, балалар ойын алаңы, волейбол алаңы, автотұрақ, амфитеатр, күннен қорғайтын шатырлар салынады. Мердігер мекеме - «Түпқараған» ЖШС. Биыл қыркүйек айында тұрғындардың игіліне беріледі деп жоспарланып отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.