Маңғыстау әкімдігінің қызметтік көліктері бірнеше емханаға берілді

Бүгін облыс әкімдігінің 30 қызметтік көлігі Ақтау қаласындағы емханаларға берілді, - деп хабарлайды mangystaumedia.kz сайты.

Енді пандемия кезінде мобильдік топтағы учаскелік дәрігерлер тұрғындардың шақыртуына осы көліктермен барады.

«Облыс әкімдігінің қызметтік көліктері аймақ басшысының тапсырмасына сәйкес беріліп отыр. 30 көлік Ақтаудағы 2 емханаға және жеке медициналық клиникалардағы науқастар санына қарай бөлінді. Егер алдағы үш күнде медициналық көліктер өңірге жететін болса, онда дәрігерлерді 100 пайыз қамтамасыз етеміз», - дейді Маңғыстау облыстық ішкі саясат басқармасының басшысы Ержан Күмісқалиев.

Айтуынша, облыстық әкімдік көліктерді дезинфекциялауды, жанар-жағармай құюды, көлік жүргізушілерін жеке қорғаныш құралдарымен қамту және т.б. шығындарды өз мойнына алды.

Еске сала кетейік, мемлекет басшысы Қасым-Жомарт Тоқаев телевизиялық үндеуінде мобильді топтардың саны 3,5 мыңға дейін арттыру керек деген болатын. Соған сәйкес өңірде мобильді топтар құрылып, өз жұмысын бастады.

Жұлдызай ҚАЛИЕВА

Сурет автордан

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.