Тойла елім, енді соғыс болмасын...

Жетпіс бес жыл біткелі алапаттың,

Жаза алмауда адамзат жарақатты.

Бүгінгі жеңіс күні еске аламын,

Ерлігін мәңгі өшпес аталардың.

***

Біз солардың жалғасымыз мәңгілік,

Батырлығын айтамыз біз ән қылып.

Өшпес даңққа бөленуде бөрілер,

Отан үшін жастай кеткен жан беріп.

***

Ер Бауыржан, Төлеген мен Мәліктер,

Ұрпағына жауынгерлік рух берер.

Әлия, Мәншүк, Хиуаздардың ерлігі

Қыздарына қазағымның нәр берер.

***

Қасым, Әди, Әзілхандар кешегі

Қаламынан жазған сөзі өшпейді.

Нұркен, Талғат сұңқарларым көктегі

Жұлдыздарың мәңгі сіздің өшпейді.

***

Асқар, Мәди, Сабалақтай ерлерім,

Жұртың үшін қас дұшпанға кектендің.

Нұрмағамбет, Сұлтан атам от кеуде

Ер қазақтың абыройын өрлеттің.

***

Арайлауда азаттықтың ақ таңы,

Ата жолы – ұрпағының мақтаны.

Жеңіс күнін думандатып қарсы алам,

Себебі мен – майдангердің ұрпағы.

***

Тойла елім, мақтан қылып ерлерді,

Тәлім қылу біздерге көп берері.

Майдан жолы – тағзым берер бағдарым,

Мәңгілікке кеткен қазақ ерлері.

***

Тойла елім, енді соғыс болмасын,

Арам ойлы тұқымымен оңбасын.

Қызғалдақтай құлпыра бер, ұлы Алаш

Қазақ мәңгі көктей берсін, солмасын.

***

Бес ауыз сөз арнап жаздым бұл күнге,

Ізетім бұл үлкенге де, кішіге.

Қарт солдаттың немересі едім мен,

Мың бір тағзым атам берген Жеңіске!

Рахат Шамиянов