«Каспий» футбол клубы алғашқы оқу-жаттығуын Түркияда өткізді

«Каспий» футбол клубы жаңа маусымға арналған алғашқы оқу-жаттығуын Түркияда өткізді. Дайындық жұмыстары 7-25 қаңтар күндері аралығында болған, - деп хабарлайды mangystaumedia.kz сайты «Каспий»ФК баспасөз қызметіне сілтеме жасап.

Жергілікті футбол құрамасы Түркиядағы спорт зал және жасыл алаңда дайындықтарын өткізіп, жаттығуларды жоғары деңгейде жүргізіп келді. Сондай-ақ оқу-жаттығу барысында үш жолдастық кездесу өткізді.

Алғашқы жолдастық ойын 15 қаңтар күні өткен. Онда Болгария чемпионатының 31 дүркін чемпионы, Софияның «ЦСКА» командасымен кездескен. Нәтижесінде «Каспий» футбол клубы 4:0 есебімен ұтылып қалған.

Содан соң жергілікті «Каспий» футбол командасы румындық «Академикамен» жолдастық ойын өткізді. Ойын барысында жергілікті ойыншы Александар Станисавлевич қарсылас команда қақпасына гол салып, есепті (1 :1) теңестірді.

https://www.instagram.com/p/B7qyFbKHXql/

Ал үшінші кездесу Болгария чемпионатына қатысатын «Этыр» командасымен өтті. Ойын нәтижесі бойынша «Каспий» футбол клубы 1:0 есебімен жеңіс жетті.

«Осы аптада «Каспий» футбол клубы өз дайындығын Ақтауда өткізеді. Содан кейін Түркияның Анталия қаласына қайта барып, ақпанның 1-25 күндері аралығында оқу-жаттығуды жалғастырады. Қазіргі таңда футболшылар құрама іріктеуінен өтіп жатыр», - дейді «Каспий»ФК баспасөз қызметі.

Жұлдызай ҚАЛИЕВА

Суреттерді «Каспий»ФК ұсынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.