Облыс еріктілері арасында шағын футболдан турнир өтті

Маңғыстау облыс еріктілерінің арасында шағын футболдан турнир ұйымдастырылды, - деп хабарлайды mangystaumedia.kz сайты.

Турнирдің мақсаты – салауатты өмір салтын қалыптастырып, еріктілердің спортқа деген оң көзқарасын қалыптастыру.

Ұйымдастырушылардың айтуынша, турнирге қатысуға 20-ға жуық команда өтініш білдірген. Алайда жас ерекшеліктері мен құрамалар мүшелерінің тәжірибесіне сәйкес 8 команда, 50 ойыншы іріктелді. Осылайша турнирге облыстық еріктілер ұйымының мүшелері, «Каспий» ФК жанында құрылған кіші топ мүшелері, Ш.Есенов атындағы Каспий технологиялар және инжиниринг университетінің студенттері қатысты.

Жалпы турнир 4 кезеңнен тұрды. Алғашқы кезең - ¼ ойыны. 8 команда арасында жеребе тастап, бір-біріне қарсы ойын ойнады. Алғашқы кезеңде жеңіске жеткен 4 команда ½ кезеңге жолдама алды.

Ал ½ ойынынан кейін 3-орынға «Қайрат» және «Нұрсейіт» футбол командалары арасында талас болса, 1-орынға «Аламан» және «Биаз» командалары бәсекеге түсті. 5 сағатқа созылған ойын нәтижесі бойынша ІІІ орынды «Нұрсейіт» командасы алды, ақшалай жүлде 30 000 теңге берілді. ІІ орын «Аламан» командасына бұйырды. Ойыншыларға 40 000 теңге сыйақы берілді. Ал жүлделі І орынды «Биаз» командасы алды. Жеңімпаз команда 50 000 теңге ақшалай сыйақымен марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.