Ұлттық спорт: аттарды жалға алуға қанша қаражат жұмсалады?

Маңғыстау облысында ұлттық спорт үшін аттарды жалға алуға бір жылға 67 500 000 теңге қаражат жұмсалады, - деп хабарлайды mangystaumedia.kz.

Мемлекеттік сатып алу сайтында жарияланған материалдарға сүйенсек, Маңғыстау облыстық спорт басқармасы Қарақия ауданының Жетібай селосына, Мұнайлы және Түпқараған аудандарына 10 миллион 500 мың теңгеге жеті-жеті аттан, ал Қарақия ауданының Құланды селосы мен Бейнеу ауданына 7 миллион 500 мың теңгеге бес-бес аттан, Ақтау қаласына 18 миллион теңгеге он екі ат, Маңғыстау ауданына 3 миллион теңгеге екі атты жалға алады.

Облыста Қазақстан Республикасының чемпионаттарына қатысатын тұрақты үш командамыз бар. Соған арнайы қаржы бөлінеді. Жеке кәсіпкерлердің аттарын командаларымыздың дайындығы үшін жалға аламыз, - дейді Маңғыстау облыстық ұлттық спорт түрлері орталығының басшысы Қанағат Сүйебаев.

Оның айтуынша, қаржы бір жылға беріледі. Әр аттың жалға алу құны 1 миллион 500 мың теңге. Қанағат Сүйебаевтың айтуынша, жылқыларды жалға беретін кәсіпкер тіпті жоқтың қасы. Атты баптаудың өзі біраз қаражатты талап етеді екен.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.