30 қыркүйекте оқушылар арасында президенттік олимпиада басталады

30 қыркүйекте маңғыстаулық оқушылар арасында үздіктерді анықтайтын Президенттік олимпиада басталады, деп хабарлайды mangystaumedia.kz.

Олимпиада «Ustudy» тестілеу орталығында «Бір қатысушы - бір компьютер - бір камера» қағидасы бойынша ұйымдастырылмақ.

Дүбірлі доданың І туры республика бойынша бір уақытта өтеді. Президенттік олимпиадада 11-сынып оқушылары жаратылыстану-математика бағытындағы математика, химия, биология және физика пәні бойынша тапсырмалар орындайды. Өлкемізден бұл кезеңге 50 оқушы қатысуға ынталы.

Президенттік олимпиада Елбасы Нұрсұлтан Назарбаевтың тапсырмасы бойынша 2008 жылдан бері өткізіліп келеді. Дәстүрлі түрде өтетін олимпиаданың облыстық кезеңі ағымдағы жылдың 30 қыркүйегіне жоспарланған. Олимпиадаға 11-сынып оқушылары қатысады. Олимпиаданың талаптары бойынша бір оқушы математика, химия, биология және физика пәнінен тапсырады және қатысушы оқушы бұрын республикалық пен халықаралық олимпиадаға қатыспаған болуы шарт. Президенттік олимпиаданың басты идеясы - жаратылыстану-математикалық бағыттағы пәндерді оқытуда оқушылардың қызығушылығын арттыру, теориялық білімдері мен дағдыларын тереңдету. Қатысушылардың ішінде жоғары ұпай жинаған 20 оқушы екінші кезеңге жолдама алады. Екінші кезеңнен сүрінбей өткен оқушы республикалық кезеңге қатысады. ҚР «Білім туралы» заңына сәйкес Білім және ғылым министрлігінің I, II және III дәрежелі дипломдарымен марапатталған Президенттік олимпиаданың жеңімпаздары мен жүлдегерлері еліміздің жоғары оқу орындарында оқу үшін білім беру гранттарын алу конкурсына қатысу кезінде басым құқыққа ие болады, - дейді МО «Дарын» қосымша білім орталығының зияткерлікті дамыту жұмыстары зертханасының басшысы Гаухар Таджибенова.

Президенттік олимпиаданың ІІ кезеңі биыл 22 қазанда өтеді. Осы аралықта І кезеңнің жеңімпаздарын халықаралық тренерлер арқылы олимпиадаға дайындау жоспарға қойылған. Облыстық кезеңнің жеңімпаздары 15-18 қарашада өтетін президенттік олимпиаданың республикалық кезеңіне қатысады.

Президенттік олимпиаданың 2019-2020 оқу жылындағы жеңімпаздары қазіргі таңда жоғары оқу орындарында білім грантымен оқып жатыр.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.