Жетібайлық тұрғындар ірі құрылыс компаниялары ұсынған жұмыстан бас тартқан

Бүгін, 31 наурыз күні «Альянс LTD», «Ақжол құрылыс», «АЙКОМ LTD» компанияларының басшылары Жетібай ауылындағы жолды жауып, наразылық білдіріп тұрған ауыл тұрғындарымен кездесіп, оларға өз компанияларынан жұмыс ұсынды, деп хабарлайды mangystaumedia.kz Қарақия ауданы әкімдігінің баспасөз қызметіне сілтеме жасап.

Құрылыс компаниясынан жетібайлық тұрғындарға жартылай тіркеме көлігінің жүргізушісі, электрик, дәнекерлеуші, учаске бастығы, асфальт төсеу машинисі, жеңіл көлік жүргізушісі, бульдозер машинисі, жүк тиегіш машинисі, жүк көлігінің жүргізушісі, тас қалаушы, сылақшы, бетоншы қызметі ұсынылған.

Бос жұмыс орындарының ең төменгі жалақысы – 223 мың теңге, ең жоғары жалақы – 450 мың теңге.

"LTD Альянсының" директоры Асқар Керелбаевтың айтуынша ұсынылып отырған бос жұмыс орындары тұрақты жұмыс болып табылады, өйткені Маңғыстауда құрылыс маусымы ұзақ.

- Сіздерге жұмыс керек екенін естігеннен кейін біз тұрақты жұмыс орындарын ұсынып, көмектесуді шештік. Бұл жақсы жұмыс орындары, олардың көпшілігіне арнайы білім қажет емес, біліктілікті арттыруға да көмектесе алады. Оның үстіне біздің компанияларда вахталық әдіспен жұмыс істеуге болады, бір вахта - 15 күн. Нарықтық жалақы алуға болады. Өкінішке орай, мұнай саласына барлық ниет білдірушілерді жұмысқа орналастыру мүмкін емес, бірақ біз сіздерге нақты жұмыс ұсынып отырмыз - деді Асқар Керелбаев.

Қарақия әкімдігінің ресми мәліметіне сүйенсек жиналғандар ұсынылған бос жұмыс орындарынан бас тартып, тек мұнай саласына жұмысқа орналастыруды талап еткен.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.