Жемқорлық жөнінде хабарлап, 800 мың теңге алды

Жыл басынан бері облыста сыбайлас жемқорлық фактілері туралы хабарлаған төрт азамат 800 мың теңге көлемінде сыйақы алды, беп хабарлайды mangystaumedia.kz сыбайлас жемқорлыққа қарсы қызметтің Маңғыстау облысы бойынша департаментіне сілтема жасап.

Қазіргі уақытта өңірде сыбайлас жемқорлыққа қарсы күреске жәрдемдесетін адамдарды көтермелеу тәжірибесі кеңінен таралуда.

«Биыл сыбайлас жемқорлық деректері туралы хабарлаған төрт азамат сыйақы алды. Олардың берген ақпараты негізінде қылмыс ашылып, сот үкімі күшіне енген соң комиссия шешімімен сыйақы тағайындалды. Осы азаматтар хабарлаған деректер ауырлығы орташа және ауыр сыбайлас жемқорлық қылмыстық істердің санатына жатады,» деді Сыбайлас жемқорлыққа қарсы қызмет департаментінің аса маңызды істер жөніндегі тергеушісі Зульфия Абишаева.

ҚР «Сыбайлас жемқорлыққа қарсы іс-қимыл туралы» Заңына сәйкес, сыбайлас жемқорлық жағдайлары туралы хабарлаған адам ақшалай қаражатпен марапатталады және мемлекеттің қорғауында болады.

Сыбайлас жемқорлық құқық бұзушылық фактісі туралы хабарлаған немесе сыбайлас жемқорлыққа қарсы іс-қимылда өзге де жолмен жәрдемдесетін адамдарға біржолғы ақшалай сыйақы мөлшері келесідей жолмен есептеледі.

- сыбайлас жемқорлық құқық бұзушылықтар туралы әкімшілік істер бойынша – 30 АЕК;
- онша ауыр емес сыбайлас жемқорлық қылмыстық істер бойынша – 40 АЕК;
- ауырлығы орташа сыбайлас жемқорлық қылмыстық істер бойынша – 50 АЕК;
- ауыр сыбайлас жемқорлық қылмыстық істер бойынша – 70 АЕК;
- аса ауыр сыбайлас жемқорлық қылмыстық істер бойынша – 100 АЕК.
Пара немесе келтірілген залал сомасы 1000 АЕК-тен асатын болса, біржолғы ақшалай сыйақы көрсетілген соманың 10 % құрайды, бірақ 4000 АЕК-тен аспайды.

Айта кетейік, сыйақы сот үкімі шыққаннан кейін төленеді.

Сыбайлас жемқорлық фактілерімен кездескен жағдайда Агенттіктің 1424 нөміріне немесе Маңғыстау облысы бойынша Сыбайлас жемқорлыққа қарсы қызметтің кезекші бөліміне 8 (7292) 319110 қоңырау шалу қажет.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.