Түпқараған ардагерлері шахмат пен дойбы ойнап, аудан мәселелерін көтерді

"Amanat” партиясы іс-сапармен Түпқараған ауданына барды. Партияның Маңғыстау облыстық филиалы жанындағы отбасы және халықты әлеуметтік қорғау кеңесі ардагерлермен кездесіп, аудандағы мәселелермен танысты, деп хабарлайды mangystaumedia.kz сайты партияның баспасөз қызметіне сілтеме жасап.

- Мәжіліс депутаты Самат Мусабаев осы ғимаратты салып берді. Үлкен алғысымызды білдіреміз және еңбегін бағалаймыз,-деді аудандық ардагерлер кеңесінің төрағасы Қуаныш Сүйеубаев.

Алқалы жиында ауыл-аймақтан жиналған қариялар өзекті үш мәселені жеткізді. Бірінші – 1892 жылы қала атауын алған Ақкетіктің тарихи қала екенін айтып, Ақкетік атауын беру мәселесін көтерді. Бұл бастама ономастикалық комиссияға ұсынылса да шешімі табылмай келе жатқаны жеткізілді.

Екінші – Таушық-Түпқараған тас жолының жасалмай қалған бөлігін аяқтау, үшінші – ақсақалдарға шипажайға демалуды ұйымдастыру мәселелері.

- Алда келе жатқан қарттар күнімен құттықтай отырып, қазыналы қариялардың батасын алуға және сіздердің айтар ұсыныстарыңызды тыңдауға келдік. Отбасы және халықты әлеуметтік қорғау кеңесі отбасы институтын қалыптастыруда жұмыстанады. Ардагерлеріміз – отбасының сәні. Немере мен ата-әже арасындағы байланысты дамытсақ келешек ұрпақ жаман болмайды. Ата-әженің берер тәлімі мол. Мейірімі де ерекше,- деді кеңес төрағасы Раушан Аймурза.

Бос уақытын ардагерлер үйінде өткізетін ардагерлер арасында шахмат пен дойбыдан турнир ұйымдастырылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.