Президенттік сайлау: Маңғыстауда 243 сайлау учаскесі ашылды

Таңғы сағат 7:00-де облыстағы барлық 243 сайлау учаскесі есігін айқара ашты. Еліміздің мемлекеттік Әнұраны шырқалып, Президенттік сайлау басталды, - деп хабарлайды mangystaumedia.kz сайты.

Дауыс беру учаскелік төрағалардың құттықтауынан кейін басталды. Таңғы уақытқа қарамастан сайлау учаскелеріне жиналған сайлаушы көп болды.

Айта кетейік, барлық сайлау учаскесі қажетті материалдармен қамтамасыз етілген, сондай-ақ мүмкіндігі шектеулі жандар үшін жағдай жасалған. Облыста барлығы 8 аумақтық сайлау комиссиясы және 243 учаскелік сайлау комиссиясы жұмыс істейді. Оның ішінде 83 сайлау учаскесі Ақтау қаласында орналасқан. Сайлау комиссияларының құрамында 1 765 адам бар. Облыс бойынша 411 103 сайлаушы бар.

Тұрғындар өз сайлау учаскесін бірнеше нұсқа арқылы біле алады. Яғни, сайлау учаскелерін «ЖСН бойынша сайлау учаскесін іздеу» ақпараттық сервисі арқылы, сондай-ақ байланыс операторлары SMS-хабарлама арқылы алынған «109» байланыс орталығының қысқа нөмірі бойынша білуге ​​болады. Екіншіден, тұрғылықты мекенжайыңызды көрсету арқылы учаскелік сайлау комиссиясынан білуге ​​болады. Үшіншіден, Kaspi.kz және Halyk қосымшаларынан да біле алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.