Нұрлан Ноғаев: Тұрғындар медициналық көмекті сапалы және уақытылы алуы қажет

МӘМС жүйесін енгізгеннен бері денсаулық сақтау саласындағы қаржыландыру және бір тұрғынның денсаулығына арналған шығыстар іс жүзінде 55,8 мың теңгеден 138 мың теңгеге дейін 2 есеге өсті. Жиналыста бастапқыда медициналық қызметтерге қол жетімділікті жеңілдету үшін құрылған, алайда көптеген тұрғындардың наразылығын тудырған жүйе туралы талқыланды. «Әлеуметтік медициналық сақтандыру қоры» КЕАҚ басшысы Елдеш Қосмағамбетов филиалдың жыл сайынғы жұмысының нәтижелерімен бөлісті, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

«ӘМСҚ» КЕАҚ филиалының басшысы Елдеш Қосмағамбетовтің айтуынша, 2023 жылы филиал 80 медициналық ұйыммен ынтымақтастық орнатқан, шарттардың жалпы сомасы 78,6 млрд теңгені құрайды. Сондай-ақ жыл сайын әртүрлі медициналық қызмет көрсетушілер саны артқан.

Ал 2022 жылы жалпы сомасы 64,5 млрд теңгеге 60 ұйыммен, оның ішінде 26 мемлекеттік және 34 жеке медициналық мекемелермен шарттар жасалды.

Сонымен қатар, 2022 жылы 4945 және 2023 жылы 5060 орынмен төсек орындарының айтарлықтай өсуі байқалды.

Медициналық қызметтерді қаржыландыру да өсті: 2023 жылы 81,6 млрд теңге қарастырылды, бұл 2022 жылмен салыстырғанда 23% - ға артық.

Аталған жақсартуларға қарамастан, өңір басшысы Нұрлан Ноғаев ӘМСҚ-ға тұрғындар тарапынан шағымдардың саны жыл сайын өсіп келе жатқанын, бұл жүйеде кемшіліктердің болуы туралы дабыл екенін атап өтті. Ол анықталған проблемаларды жою мақсатында облыстық денсаулық сақтау басқармасы басшысы және ӘМСҚ өңірлік филиалының басшысы Елдеш Қосмағамбетовке нақты тапсырмалар берді.

- Біздің көптеген тұрғындарымыз әлеуметтік медициналық сақтандыру қорының (ӘМСҚ) жұмысының мәнін және ай сайынғы төлемдердің себебін толық түсінбейді. Медициналық сақтандыру жүйесін енгізудің басынан бастап оның басты мақсаты әртүрлі медициналық қызметтердің қолжетімділігін жеңілдету және арттыру болды. Алайда, бұл жүйенің қажеттілігі ақпараттың жеткіліксіздігіне байланысты көпшіліктің наразылығын тудырды. Тұрғындар дәрігерлер оларды ақылы медициналық мекемелерге жібереді деп шағымданады, ал дәрігерлер болса бұл халықтың өсуіне және көрсетілетін қызметтердің өсуіне байланысты қаржыландыру лимитінің таусылуына сілтеме жасайды. Сонымен бірге дәрігерлер медициналық қызметтерді бағалау жүйесінің жетілмегендігіне және ӘМСҚ төлемдерінің кешігуіне шағымданады. Біздің облыстың әрбір сақтандырылған тұрғыны сапалы және уақтылы медициналық көмекке ала алатынына сенімді болуы қажет. Көптеген адамдар емханалардағы басқару процестері, олардың қызмет көрсетушілермен қарым-қатынастары мен қаржыны игеру мәселесі қызық емес. Олар үшін өздері төлеп отырған ақыға, сапалы қызмет алу маңызды. Біздің азаматтарымыз медициналық көмек алу кезінде қолайсыздыққа тап болмауын қамтамасыз ету қажет. Бұл жағдай адамдардың жергілікті медицинаға деген сенімін төмендетеді. Олар өз проблемаларының осында шешілетініне сенімді болуы керек және бұл үшін ӘМСҚ жұмысына түзетулер енгізу қажет, - деп атап өтті Нұрлан Ноғаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.