Маңғыстауда жаңбырлатып суару арқылы ауыл шаруашылығын дамыту жоспарлануда

28 ақпанда облыс әкімі Нұрлан Ноғаев жұмыс сапарымен Маңғыстау облысында барып, Жармыш ауылынан 1,9 шақырым жерде орналасқан «Сарықабақ» су қоймасының жұмысымен танысты, - деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Маңғыстау ауданына жұмыс сапары аясында Нұрлан Ноғаев алдымен Жармыш ауылынан 1,9 шақырым жерде орналасқан «Сарықабақ» су қоймасында болды. Су қоймасының аумағы - 17,64 гектар.

2019 жылы «Сарықабақ» су қоймасы гидротехникалық құрылыстар санатына енгізілді. Осыған байланысты су қоймасының бөгетін қалпына келтіру жобасы қолға алынды. Қазіргі уақытта 7 млн ​​теңгеден астам сомаға жобаның жобалық-сметалық құжаттамасы әзірленді.

Маңғыстау ауданының әкімі Ғалымжан Ниязовтың айтуынша, бөгет жаңбыр суын жинап, елді мекенді төтенше жағдайдан сақтайды. Жаңбыр суымен толтырылғандағы сыйымдылығы - 600 мың текше метр.

Жасанды су қоймасымен танысқан Нұрлан Ноғаев жаңбыр суын егін шаруашылығын дамыту мақсатында пайдалануға болатынын атап өтті.

Содан соң аймақ басшысы Жармыш ауылынан 35 шақырым жерде орналасқан «Құлжановтар» шаруа қожалығының жұмысымен танысты. Шаруа шаруашылығы егін және мал шаруашылығымен айналысады. Шаруашылықта 70 жылқы, 200 қой-ешкі, 40 түйе, 10 сиыр бар.

Шаруа қожалығында 2019 жылы жоңышқа егіліп, 4 жыл бойы өнімі алынуда.

Ал 2022 жылы 25 гектар жерге мал азығын өсіру үшін Түркиядан әкелінген сақиналы жаңбырлатқыш орнатылды. Былтырдан бері «Маңғыстау тәжірибелік-ботаникалық бағы» республикалық мемлекеттік кәсіпорны шаруа қожалығында 3 жыл мерзімге азықтық шөптің, оның ішінде жоңышқа, гүл тәжінің, жер алмұртының әртүрлі сорттарын өсіру бойынша инновациялық жобаны өндірістік мақсатта тәжірибеге енгізе бастады. Құрылғының көмегімен былтыр 2500 гектар жерден 8 мың тук шөп өндірілді. Өнімдер Жармыш пен Шетпе тұрғындарына қолжетімді бағамен сатылды. Сондай-ақ 70 жеміс ағашы отырғызылды.

Шаруа қожалығы бұл жұмыстарды мемлекеттік қолдау арқылы атқаруда. Яғни, шаруалар 5 млн теңге көлемінде субсидия алды. Нәтижесінде трактор, шөп шабатын, тырма, пресс сатып алынды.

Нұрлан Ноғаев өңірдегі ауа райы жағдайын ескере отырып, ауыл шаруашылығына инновациялық технологияларды енгізу қажеттігін атап өтті.

– Маңғыстау облысының экономикасын әртараптандырудың тағы бір маңызды бағыты – ауыл шаруашылығын дамыту. Алайда қыста қардың, көктемде жауын-шашынның болмауы мал бағып, егін шаруашылығымен айналысатын шаруаларға қиындық туғызуда. Сондықтан мемлекет тарапынан берілген мүмкіндіктерді тиімді пайдаланып, ауыл шаруашылығын қарқынды дамытуға кірісу керек. Біз үшін шаруашылықтардың заманауи технологиялық қондырғыларды пайдаланып, ғылыми тәжірибеге сүйене отырып, ауыл шаруашылығын өркендетуі маңызды, - деді Нұрлан Ноғаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.