Экологтар аққулар арасында тараған құс тұмауының қашан тоқтайтынын айтты

Ақтауда өткен брифингте экологтар, вирусологтар және СЭС қызметкерлері журналистердің сұрақтарына жауап берді. Қазіргі уақытта тек құстардың ұшып кетуін күту ғана мәселенің шешіміне нақты ұсыныс болып отыр. Өйткені экологтар құстың қазіргі жағдайын табиғи сұрыптау деп атады, деп хабарлайды mangystaumedia.kz.

Бүгінде өңірде үй құстары арасында да мониторинг жүргізіліп жатыр. Өткен күзде 6 мыңнан астам құсқа алдын ала вакцинация жасалды. Сонымен қатар, аймақта жабық ұстау режиміндегі фабрикаларда 380 мың құс бар. Сондықтан мұнда вакцинация қажет емес. Бірақ қазіргі жағдайды ескере отырып, тағы 9 мыңға жуық вакцина дозасы сұралды, Каспий жағалауындағы барлық құсқа вакцинация жүргізіліп жатыр.

"Аққулар арасындағы қазіргі жағдайды табиғи сұрыптау деуге болады. Қазірдің өзінде біз 900-ге жуық құстың өлекселерін таптық. Биыл көлде 87 мыңға жуық түрлі құстар қыстап жатыр. Ал бұрынғы уақытта 2-10 мың аралығында болды. Өткен жылдары құс тұмауына байланысты жағдайлар санаулы ғана құс арасында болды. Егер пайыздық мөлшерлемемен алсақ, онда инфекцияның пайызы бірдей деңгейде. Тіпті алдыңғы жылдарға қарағанда аз. Жануарлар әлемінде әрқашан табиғи сұрыпталу жүреді. Күштілер аман қалады, ал әлсіздері өледі. Әлемде құс тұмауы жағдайлары көбейіп келеді», - деді Ветеринариялық бақылау және қадағалау комитетінің Маңғыстау облыстық аумақтық инспекциясының басшысы Темірбек Нұртазин.

- Құс тұмауы қашан тоқтайды? Қандай болжамдар бар?

- Қазіргі уақытта ветеринарлар мен ғалымдардың ұсыныстары тек бақылау болып отыр. Жалпы, бұл вирус құс денесінен сыртқа нәжіс арқылы шығарылады. Қазіргі температура режимі вирустың өмір сүруіне ықпал етеді. Құстар әлі күнге дейін көлге келеді. Егер құстар одан әрі ұшып кете бастаса, ауру қарқыны төмендей түспек.

- Құстар ұшып кеткен жағдайда басқа жаққа барып өле ме?

- Көлден тек күштілері ғана ұшып кете алады. Біз тек аумақта санитарлық тазалауды ұйымдастырып, тұрғындар бармас үшін бекеттер қоя аламыз. Егер адам ауру құсты ұстаған жағдайда оны жұқтыруы мүмкін, - деп жауап берді Темірбек Нұртазин.

Сондай-ақ, СЭС мамандары әлемде адамның құстан құс тұмауы вирусын жұқтыру жағдайлары аз деңгейде тіркелгенін атап өтті. Бірақ Қазақстанда әзірге құс тұмауына қарсы вакцина жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.