Маңғыстау облысына саяхаттап келетін туристер қатары жыл санап артып келеді. Мәселен биыл өңірге Франция, Жапония, Италия, Германия, Англия және Кореядан қызуғышылық танытып келгендер көп. Ресми есеп бойынша жыл басынан бері аймақ 250 мыңнан аса саяхатшыны қабылдаған, деп хабарлайды mangystaumedia.kz.
Аспан астындағы мұражай саналатын Маңғыстау өңіріне саяхаттап келушілер жер асты мешіттерін аралайды. Шопан ата мен Бекет ата, Қараман ата, Сұлтан үпі, Шақпақ ата жерасты мешіттері туристер баратын танымал орындардың тізімінде. Маңғыстаудың тұмса табиғатын көруге келгендерді сан ғасырлық тарихы бар мекендер қызықтырса керек.
- Мен Санкт-Петербургтен келіп, көп жерді араладым. Бұл жердің табиғаты өте әдемі. Бір барған жерге тағы бара бергің келеді, өйткені жақсы әсер қалдырады. Мен мұнда Айрақты, Шерқала тауларына, шарлар алқабы – Торышқа да бардым. Бірнеше елді аралаған турист ретінде Маңғыстау облысының туризмдегі әлеуеті жоғары деп айта аламын, - дейді Ресейден келген саяхатшы Александр Нарчев.
Сонымен қатар туристер Бозжыра шатқалынан бөлек, Айрақты, Шерқала тауларына баруға асық. Маңғыстау ауданының тұрғындары жаугершілік заманда бұл таулар елдің қорғаны болған деседі. Осы таулардың бөктерінде емдік шөптер де көп кездескен екен. Тарихы тереңде жатқан осы мекенді көруге келгендер жақын маңдағы «Көгез» этно ауылына тұрақтайды. Демалыс орнының басшысы жылына 5 мыңға жуық турист келетінін айтып отыр.
- Биыл шетелдіктер көп келіп жатыр. Биыл қонақтарымыздың 80 пайызы Франция мен Кореядан келді. Өйткені біз орналасқан жолдың бойында 80-нен астам жерасты мешіттері мен, тарихи-мәдени орындар бар. Әрине мұндай орындарға туристер қызығады. Біз келушілеріміз үшін бүкіл жағдайды жасап қойдық. Демалуға арналған, тамақ ішетін және фотосессия жасайтын бірнеше киіз үйіміз бар. Сондай-ақ мұнда қонақтарға ұсынылатын тағамдардың барлығы табиғи, - дейді «Көгез этно ауылы» ЖШС директоры Евгения Слюсарева.
Сондай-ақ Маңғыстауға саяхаттап келгендер өлкетанушы, этнограф Серікбол Қондыбайұлы атындағы мұражайдан өңірдің тарихы мен табиғаты жөнінде тың ақпарат ала алады. Бірнеше жыл бойы өңірдің географиясы мен тарихын зерттеген ғалымның мұрасы осы мұражайдан табылады. Мұнда кіру ақысы ересектерге 200 теңге, Шетпе ауылының тұрғындары үшін 100 теңге.
Ал туризм басқармасының басшысы Мәулен Ғабдулқалиевтің айтуынша биыл Бастыс Еуропдан келгендер Каспийден гөрі, тарихи мекендер мен жерасты мешіттеріне қызығушылық танытыпты.
- Бүгінгі таңда көбі Маңғыстау туризмін тек қана Каспий теңізімен байланыстырады. Біз туристерімізге табиғи орындарды, ескерткіштерді, музейлерді танытқымыз келеді. Себебі сол арқылы біз Маңғыстаудың тарихы тереңде жатқанын айтып, көрсеткіміз келеді. Туризмдегі ең бастысы – сапалы қызмет. Сол себепті экскурсологтар мен гидтарды арнайы оқыттық. Қазір өңірде сертификациядан өткен 45 гид-экскурсолог бар. Сондай-ақ табиғи және тарихи ескерткештері бар орындарға ақпараттық тақтайшалар орнатып жатырмыз. Бұдан бөлек саяхаттайтын жаңа бағыттарды да дайындап жатырмыз. Өйткені Маңғыстау облысында 13 мыңнан астам тарихи өлкетану ескерткіштерін танытуға ниеттеніп отырмыз, - дейді Маңғыстау облыстық туризм басқармасының басшысы Мәулен Ғабдулқалиев.
Саяхатшылар жеті жұрт келіп, жеті жұрт кеткен бұл мекеннің тылсым табиғатымен далада жүріп танысса, байырғы өңір халқының тұрмыс-тіршілігін мен тарихын Шетпе кентіндегі тарихи-өлкетану мұражайынан біле алады.
Махаббат НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
