Ақтаудағы концертте 200-ден астам бала адасып қалған

Ақтауда өткен концертте полицейлерге 200-ден астам баланың адасып кеткені туралы хабарлама түскен. Бұл туралы Маңғыстау облыстық Полиция департаментінің баспасөз қызметінен мәлім етті, деп хабарлайды mangystaumedia.kz тілшісі.

Өңірдегі ірі мұнай компаниясы мерейтойына орай 30 тамыз күні теңіз жағалауындағы амфитеатрға концерт өткізген. Республикаға танымал әнішілер өнер көрсеткен концертті тамашалауға барғандардың қатары көп болған. Іс-шараны көруге барған 200-ден астам баланың адасып қалғаны туралы полицейлерге хабарлама түсті.

«Қауіпсіздікті қамтамасыз ету мақсатында іс-шараға 300-ге жуық полиция қызметкері жұмылдырылды. Балалардың жоғалғаны туралы келіп түскен өтініштердің жалпы саны – 200. Адасып кеткен балалардың ең кішісі 3-те, үлкені 15 жаста болды. Олардың барлығы табылып, ат-аналарына аман-сау тапсырылды. Ауа райының салқындауына байланысты жеткіншектер тоңып қалмау үшін автобуспен жақын маңдағы учаскелік полиция бөліміне жеткізілді. Балаларды іздеп, табу 15 минуттан 1 сағатқа дейінгі уақытты алды», - делінген баспасөз мәліметінде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.