Ақтауда желдің екпіні секундына 15-25 метрге жетіп, салдарынан қаланың бас шыршасы құлап қалды. Мамандар жел басылған соң, шыршаны қайта орнататын болды, деп хабарлайды mangystaumedia.kz қала әкімдігінің баспасөз қызметіне сілтеме жасап.
Ақтау қалалық тұрғын-үй коммуналдық шаруашылық бөлімінің айтуынша, шыршаны орнату кезінде техникалық арнайы бетон блоктар, тросс сымдар қолданылған. Жел басылған соң құлаған шыршаны орнату жұмыстары жүргізілмек.
«28 желтоқсан күні ауа райының қолайсыздығына байланысты 15 шағынаудан амфитеатр алаңында орнатылған шырша құлады. Амфитеатр алаңының айналасында құрылыс нысандары, ғимараттар болмаған соң желдің екпіні қатты сезіледі. Шырша орнату барысында техникалық талаптардың барлығы сақталған. Тросс сымдары мен темір бетондар тұрғанына қарамастан осындай жағдай орын алды. Мердігер мекеме тарапынан шыршаны қайта орнату жұмыстары ауа райы тұрақталғаннан кейін жүргізіледі. Келтірілген қолайсыздықтар үшін әкімдік тарапынан кешірім сұраймыз», - деді Ақтау қалалық тұрғын-үй коммуналдық шаруашылық бөлімінің басшысы Жанболат Жақыпов.