Ақтауда хакатон жеңімпаздары марапатталды

Ақтауда ҚР Мәдениет және спорт министрлігі мен «Kazakh tourism» ұлттық компаниясының, сондай-ақ Маңғыстау облысы әкімдігі мен «Astana Hub» компаниясының қолдауымен өткен хакатонда саяхатшылардың қолдануына ыңғайлы болатын қосымшалар жасаған үздік командалар анықталды, деп хабарлайды mangystaumedia.kz Қоғамдық коммуникация орталығына сілтеме жасап.

Шара «Rixos Water World Aktau» қонақ үйінде өтіп, 43 қатысушыдан құралған 10 команданы жинады. Жарысты тамашалауға 500-ге жуық қала жастары мен қонақтары келді.

Ұйымдастырушылардың айтуынша, қатысушы командалардың өнімдері инвесторлардың назарын аударған. Жеңімпаз атанғандардың әрқайсысы ерекше жобаларды дайындаған. Командалар өзара тәжірибе алмасып, пайдалы ақпараттар алған.

Шара қортындысы бойынша бірінші орынды ақтаулық «Star Family» командасы иеленді. Отбасылық командада әкесі және 7, 9-шы сынып оқитын оқушы ұлдары бар. Олар ұсынған жоба - сайт, whatsapp/telegram әлеуметтік желілерінде қолданылатын бот жасап, яндекс алиса және іздеу жүйелерімен интеграция әзірлеген. Сонымен қатар, пайдаланудың қарапайымдылығы үшін барлық боттар мен интеграцияларды басқарудың жалпы парақшасын жасаған. Әкесі тапсырмаларды үйлестірумен айналысса, ұлдары тапсырмалардың барлық кодтарын дайын құралдарды түбегейлі пайдаланбай жазып шыққан.

Ал, 2-орынды «Hacktau» командасы алды.

Олар туристер үшін де, гидтер үшін де жеке куәліктің сәйкестендіру нөмірі бойынша верификация арқылы кіріп, гидтерді оқыту және сертификаттау мүмкіндігі бар ыңғайлы қосымшаны дайындаған.

Үздік үштікті «Bon Voyage» командасы қорытындылады. Командада Ақтау қаласындағы Назарбаев зияткерлік мектебінің 9-11 сынып оқушылары бар. Олар бірнеше минут ішінде турларды брондау және төлеу мүмкіндігі бар қосымшасын әзірледі. Сонымен қатар, өз қосымшаларын жарнамалау үшін арнайы бейнеролик жасаған.

Шара қорытындысы бойынша екі команда «Astana Hub» компаниясына шақырылды. Ал командалардың бірінің жобасына жергілікті туризмді дамытып жүрген инвесторлар қызығушылық танытты.

Жалпы, хакатон дегеніміз - бағдарламалық қамсыздандыруды жасақтаудың әртүрлі салаларынан жиналған мамандардың қандай да бір мәселені шешу мақсатында бірігіп жұмыс істеу үшін ұйымдастырылатын шара.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.