Ақтауда ерекше балалар үшін спорттық фестиваль өтті

Ақтауда алғаш рет қалалық футбол федерациясының ұйымдастыруымен ерекше балаларға арналған «Балалар болсын бақытты!» атты фестиваль өтті, деп хабарлайды mangystaumedia.kz Қоғамдық коммуникация орталығына сілтеме жасап.

Спорттық фестивальге 8 жастан 20 жасқа дейінгі ерекше балалардан 44 спортшы қатысты. Олар бочча, голбол, стол теннисі және шағын футболдан бақ сынады. Аталған шараны өткізудегі басты мақсат - салауатты өмір салтын насихаттап, ерекше балаларға естен кетпес әсер сыйлау.

- Бұл фестивальді өткізу 2 ай бұрын жоспарланған. Шара облыстық ерекше балалардың ата-аналар одағы мен ерекше балалар спорт клубының қолдауымен өтіп жатыр. Бүгінгі жарысқа Ақтау қаласынан ғана емес, өңірдегі аудандардан да ерекше балалар қатысуда, - деді Ақтау қалалық футбол федерациясының төрағасы Еркебұлан Сейтбаттал.

Фестиваль соңында барлық қатысушы арнайы дипломдармен, эксклюзивті сыйлықтармен марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.