9 ақпан күні ақын, сазгер Талғат Атшыбаевтың шығармашылығына арналған «Айтылмаған ән» атты кеш өтеді, деп хабарлайды Mangystaumedia.kz сайты.
Өнер кеші 9 ақпан күні, сағат 17:00-де, «Достық» үйінде өтеді.
Талғат Атшыбаев – киелі Маңғыстау өңірінде қысқа ғана ғұмыр кешіп, кәусар сезімінің сиқырлы пернесін баса алған, сүмбіленің ала таңын сүйіп, құсни-сағынышын «Сылаңсазға» ұластырған, шаттығының шалқар шабытынан «Шалқымалысы» дүниеге келген талғамы биік, тойнағы бөлек талантты ақын.
Ол 1959 жылы, мамыр айының 26-шы жұлдызында Маңғыстау облысы, Маңғыстау ауданы, Шайыр ауылы Үстірттің «Қосархан-Шахан» жайлауында дүние есігін ашқан. 1976 жылы Шайыр орта мектебін тәмамдап, бір-екі жыл колхоз шаруашылығында еңбек етіп, 1979 жылы Орал қаласындағы А.С Пушкин атындағы институттың филология факультетіне оқуға түскен. Институттегі оқуын 1982 жылы аяқтап, бір жылға жуық уақыт Маңғыстау ауданының «Жаңа өмір» газетінде тілшілік қызмет атқарған. 1983-1984 жылдары Кеңес әскері қатарында азаматтық борышын өтеп елге оралған. «Шалқымалы» әнінің тууына негіз болған зайыбы Түзел Сансызбайқызына 1985 жылы үйленген. 1994-2009 жылдары Маңғыстау облыстық «Қазақстан-Ақтау» телеарнасында өнімді еңбек еткен.
«Шалқымалы», «Шалқыма», «Сылаңсаз» сынды әндердің авторы. Ақынның Жанар Айжанованың, кейін Қазақстанның халық әртісі, Мемлекеттік сыйлықтың лауреаты Мақпал Жүнісованың орындауындағы «Шалқымалы» әні кең таралып, тыңдарман қауымның сүйіспеншілігіне бөленген.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
