Ақтау жағалауындағы заңсыз сауда орындарына рейд жүргізілді

Ақтауда 14 шағынауданда орналасқан жағалау маңында сауда жасаушылардың жұмысы жандана бастады. Тұрғындар "жайма базарға" қарсылық білдіріп жатыр, ал заңсыз жұмыс істейтін «саудагерлер» пайда әкеліп отырған орнынан кеткісі келмейді. Себебі теңіз жағалауы жергілікті тұрғындар мен қала қонақтарының жиі жүретін орны. Мұнда заңсыз сауда нүктелерінен бөлек, заңды түрде жұмыс істейтін кәсіпкерлер де бар. Бірақ қала тұрғындары олардың да қызметін тексеруді талап етуде. Жақын маңдағы үйлердің тұрғындары мопед мінген курьерлердің үздіксіз шуына, сондай-ақ фастфуд сауда нүктелерінің маңында жастардың жиналуына шағымданды.

- Түнде кәмелетке толмаған балалар үнемі мопед мінеді. Олар біздің тыныштықты бұзады. Оның үстіне айналамыз әжетханаға айналып кеткен, - дейді қала тұрғыны Лаура Тұманшаева.

– Түнде мына мопедтердің дауысынан тыныштық жоқ. “Астана” сауда орталығының 24 сағат жұмыс істеуі заңды ма деп сұрағым келеді. Неліктен мопед пен мотоцикл мінгендер үнемі осында жиналады, оларды біздің жол полициясы неге бақыламайды? - деді қала тұрғыны Күләнда Өтегенова.

14 шағынаудан тұрғындары мен мемлекеттік мекемелердің және полиция қызметкерлерінің қатысуымен өткен рейд Ақтау қалалық мәслихатының депутаты Гүлмира Әбішеваның бастамасымен ұйымдастырылды. Бұл – қала тұрғындарын толғандырып жүрген мәселелерді шешуге мүмкіндік. Қала әкімдігінің өкілдері кәсіпкерлерден тиісті құжаттардың бар-жоғын тексеруге уәде берді. Егер құжаттары жоқ болса немесе талапқа сай болмаса, павильондар айыппұл тұрағына алынады.

- Қазір қандай рұқсаттары бар екенін анықтаймыз. Олай болмаса, бұзуға немесе бұзуға рұқсат беретін қадағалау органына, яғни Мемлекеттік сәулет-құрылыс бақылауы немесе жер инспекциясына хат жібереміз, - деді Ақтау қалалық сәулет және қала құрылысы бөлімінің басшысы Смағұл Төкешов.

Осы орайда сауда нүктелерінің заңды иелері де белсенділерге назын айтып үлгерді.

«Біздің де құқығымыз бұзылады, бірақ қорғайтын ешкім жоқ. Алкогольді өнімдерді емес, тек шай мен кофе сусындарын сатамыз. Тазалықты қадағалап, павильонды жыл сайын жаңартып отырамыз», – дейді олар.

Мәселен, кәсіпкерлердің бірі өз қаражаты есебінен жақын маңдағы «бизнесмендерді» электр қуатымен қамтамасыз етуге 3 миллион теңге жұмсаған. Бірақ олар электр энергиясының ақысын төлемеген. Белгілі болғандай, стихиялық кәсіпкерлер табысы аз адамдар санатына жатады. Сондықтан олар мүмкіндігінше жан бағуға тырысады.

- Бүгін қала әкімінің өкімімен заңсыз сауда орындарына мониторинг басталды. «Астана» сауда орталығының маңындағы нысандарды тексердік. Кәсіпкерлерге ескерту жасадық, үш күн ішінде орнын босатуы керек. Егер осы уақыт ішінде сауда нысаны алынбаса, заң бойынша тағы бір хабарлама береміз. Егер жағалаудағы "жайма базар" әлі де жиналмаса, онда коммуналдық қызметтердің көмегімен және полицияның сүйемелдеуімен өзіміз алып тастауға құқығымыз бар, - деді Ақтау қалалық кәсіпкерлік және ауыл шаруашылығы бөлімі басшысының орынбасары Оспан Нысан.

Алдағы уақытта жағалаудағы фаст-фуд сататын орындарға да рейд жүреді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.