Ақтау қаласы әкімдігінің бас маманы: Мемлекеттік қызметкер болу - үлкен мәртебе

Аян Успанов 2023 жылдан бастап «Ақтау қалалық құрылыс бөлімі» мемлекеттік мекемесінде мемлекеттік сатып алу секторының бас маманы болып жұмыс істейді. Оның айтуынша, мемлекеттік қызмет өмірінің маңызды бөлігіне айналды, - деп хабарлайды mangystaumedia.kz қала әкімдігінің баспасөз қызметіне сілтеме жасап.

Аян Успанов 2016 жылы Маңғыстау политехникалық колледжін «Есептеу техникасы және автоматика» мамандығы бойынша бітірген. 2022 жылы Орал қаласындағы «Қазақстан инновациялық және телекоммуникациялық жүйелер» университетін тәмәмдап, «Экономика және қаржы» мамандығы бойынша бакалавр дәрежесін алды. Аян Успанов ресми еңбек жолын 2018 жылы Ақтау қаласындағы«№2 арнаулы әлеуметтік қызметтер көрсету орталығы» КММ-де бухгалтер лауазымынан бастаған. Кейін жеке компанияларда, басқа қалаларда әртүрлі сала бойынша жұмыс істеген. 2023 жылы ол мемлекеттік қызметке тест тапсырып, өз құжаттарын Ақтау қаласының әкімдігіне тапсырды. Конкурстық комиссия мен сұхбат қорытындысы бойынша «Ақтау қалалық құрылыс бөліміне» жұмысқа қабылданды.

- Мен тағдырымды мемлекеттік қызметпен жақында ғана байланыстырсам да, бұл менің өмірімнің ажырамас бөлігіне айналып үлгерді. Мемлекеттік қызметкер болу мен үшін үлкен мәртебе! Мен мемлекеттік бағдарламаларды іске асыруға және Қазақстанды дамытуға көмектесу арқылы қоғамға өз үлесімді қосамын. Мемлекеттік қызметте менің нақты мақсат қоя білу, жауапкершілік, тәжірибе жинақтау, жұмыста да, өмірде де жүктелген міндеттерді атқара білу сияқты қасиеттерім шыңдалды, - дейді Аян Успанов.

Аян Успанов қалалық әкімдікте өз жұмысын жетік меңгерген сауатты мамандар және әрдайым көмектесуге дайын адамдар жұмыс істейтінін атап өтті.

- Мен әріптестеріме ғана емес, алғашқы жұмыс күндерімде көмек көрсетіп кеңес берген барлық бөлімдерге үлкен алғысымды білдіргім келеді. Менің жұмысым жоғары жауапкершілікті, ұқыптылықты талап етеді. Себебі тұрғындар бізге жиі сұрақтарымен, өтініштерімен жүгінеді. Біз оларға көмектесу үшін заңнамаға сәйкес қолдан келгеннің бәрін істеуге міндеттіміз. Болашағы айқын әрі жарқын елде туып-өскенімді мақтан тұтамын. Мемлекетіміздің әлеуметтік-экономикалық дамуы жолында аянбай еңбек етемін - деді Аян Успанов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.