Коммуналдық тарифтер көтерілмейді

Бұл туралы қоғамдық коммуника­циялар орталығында өткен брифинг­те ҚР ҰЭМ Табиғи монополияларды реттеу комитетінің Маңғыстау облысы бойынша департаменті басшысының міндетін атқарушы Кенжеболат Көшекбаев мәлім етті.

- Мемлекет басшысының тариф құрудың ашықтығын қамтамасыз ету және та­биғи монополистердің тауарлары мен қызметтеріне бағалар және тарифтердің көтерілуі­не қарсы күресті күшейту тапсырмаларын орындау мақсатында жол картасы қабылданды. Бұның ая­сында БАҚ-­пен бірлесе коммуналдық қызметтерге тарифтерінің өзгеруіне байланысты түсініктемелік жұмыстар жүргізу тапсырылды. Біздің департамент Маңғыстау облысы бойынша табиғи монополия саласын­да және қоғамдық маңызы бар нарықтарда мемлекеттік бақы­лау мен реттеуді жүзеге асы­рады. Бүгінгі таңда тариф­тер бұрынғы қалпында. 2019 жылдың желтоқсанында депар­таментке «AllianceEnergoSnab­Aқтау» ЖШС Маңғыстау об­лысы бойынша филиалынан Ақтау қаласы және Мұнайлы аудандарының тұтынушыларына электр энергиясының тарифін көтеру туралы өтініш түскен бо­латын. Халық үшін 5 пайызға, заңды тұлғалар үшін 15 пайызға көтеруді ұсынған. Алайда де­партамент тариф өсіруге ешқандай негіз жоқтығын алға тартып, тарифтерді өзгеріссіз қалдырды. Сондай-­ақ 2019 жылы желтоқсанда реттелетін жылу және сумен жабдықтау қызметтеріне та­рифтер «МАЭК-­Қазатомөнеркәсіп» ЖШС және «Өзен жылу» МКК үшін бекітілді. Бұл аталған субъектілердің тұрғындары үшін тарифтер 2019 жылдың деңгейінде өзгеріссіз қалды. Департа­мент коммуналдық қызметтерге тарифтердің не­гізсіз өсуіне жол бермей, тарифтерді төмендету жұмыстарын жалғастыра беретін болады, – деп атап өтті Кенжеболат Қуандықұлы.

Оның сөзін қостаған Ақтау қаласы әкімінің орын­басары Серік Гусман коммуналдық тарифтер облыс пен қала әкімшіліктерінің жіті назарында тұрғанын айтты. «2020 жылы коммуналдық қызметтерге тарифтер­ді көтеру қарастырылмаған. Облыстық және қала­лық әкімшіліктері Табиғи монополияларды реттеу комитетінің Маңғыстау облысы бойынша депар­таментімен тығыз қарым­-қатынаста жұмыс істеп, халық үшін маңызды әрі өзекті мәселеге бейжай қарамай, ұдайы бақылауда ұстап отыр», – деді ол.

Ханым ҚУАТ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.