Маңғыстаулық 121 кәсіпкер 1 пайыздық несие алды

«Нұр-Капитал» бағдарламасы аясында 121 жоба үшін 2,4 млрд. теңгеге несие алынып, мыңнан астам жаңа жұмыс орны құрылған. Соның ішінде Мұнайлы ауданы 44 жобамен көш бастап, Жаңаөзен қаласында 38 жоба, Бейнеу ауданында 12 жоба, Түпқараған ауданында 11 жоба, Маңғыстау аданында 9 жоба, ал Қарақия ауданында 7 жоба жүзеге асырылған.

Маңғыстау облыстық қоғамдық коммуникациялар орталығының мәліметінше, өңірде кәсіпкерлікті қолдайтын «Нұр-Капитал» бағдарламасына сұраныс артып жатыр. Бұл бағдарламаның ерекшелігі - кәсіпкерлерге 1% үстемақымен несие алып бизнес бастауына мүмкіндік береді.

Жоба аясында «ӨзенМұнайГаз» ААҚ-тан 900 миллион теңге және «Даму» қорынан 1,8 млрд теңге қаражат бөлінген. Облыстың кәсіпкерлік саласын қолдау мақсатында жалпы құны 2,7 млрд теңге болатын несие ресурстары бағытталды. Бұл қаражатАҚ «Forte bank», АҚ «Сбербанк», АҚ «Қазақстан Халық Банкі», сондай-ақ, АҚ «Банк Центр Кредит» банктері арқылы 8,5% бөлініп, жергілікті бюджет бойынша 7,5 пайызбен субсидияланған. Сәйкесінше, соңғы қарыз алушы үшін пайыздық мөлшерлеме 1% құрайды.

Берілетін қаражат инвестицияларға несие сомасының 30 пайызынан асырмауды мақсат етіп, инвестициялық несие аясында айналым капиталын толықтыруға бөлінеді.

Несие мерзімі инвестициялар үшін 7 жылға дейін, ал айналым қаражаттарын толықтыру үшін 3 жылға дейін.

Несие алушы «Бизнестің жол картасы 2020» бизнесті қолдау мен дамытудың мемлекеттік бағдарламасы аясында 85% дейін мемлекеттік кепілдік ала алады және оғаннесие тұрақты жаңа жұмыс орындарын құрайтын жағдайда ғана беріледі.

Өндіріс, ауыл шаруашылығы, туризм, қызмет көрсету «Нұр-Капитал» жобасының негізгі бағыттары болып саналады, сәйкесінше барлық жобалар Өңірлік үйлестіру кеңесінің рұқсатынан өтеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.