«Жас сарбаз» әскери-қозғалысы жас патриоттармен толықты

Ақтау қаласындағы N22 орта мектеп пен мамандандырылған IT-лицейінің 30 оқушысы салтанатты түрде ант беріп, ресми түрде «Жас сарбаз» қозғалысының қатарына қосылды, деп хабарлайды mangystaumedia.kz Ақтау горнизонының баспасөз қызметіне сілтеме жасап.

Салтанатты рәсім Каспий теңізінің жағалауында өтті. Оған Ақтау гарнизонының әскери қызметшілері, Қарулы күштердің ардагерлері, қоғам өкілдері қатысты.

Қатарға қосылатындарға арнап әскери-теңіз базасының бастығы 2-дәрежелі капитан Бауыржан Мұратұлы, Қарулы күштердің ардагері Қайрат Төлепбаев және «Жас Сарбаз» республикалық әскери-патриоттық қозғалысының төрағасы Мейірбек Меңдіғалиев сөз сөйледі. Олар жас ұрпаққа ел игілігі жолында адал қызмет етуге тілектестігін білдірді.

-Қазір өзімнің жас сарбаз, жас теңізші екенімді мақтан тұтамын. Бәрінен де әскери-теңіз базасына барғанымыз қызықты өтті. Болашақта Отанымды қорғап, әскери қызметші болуды армандаймын, – деді №22 орта мектептің 9 сынып оқушысы Елдос Сүлеймен.

Іс-шара барысында жас патриоттарға «Маңғыстау» зымыранды-артиллериялық кораблін аралатты. Әскери теңізшілер оның құрылысы мен мүмкіндіктері туралы айтып, құрал-жабдықтарын, каюталары мен қару-жарақтарды көрсетті.

Әскери-теңіз күштерінің матростары өздерінің мерзімді қызмет тәжірибесімен бөлісіп, күнделікті жұмыс күндері мен оқу-жауынгерлік қызметі қалай өтіп жатқанын айтты.

Қазіргі уақытта «Жас сарбаз» республикалық қоғамдық бірлестігі 7 мыңнан астам әскери-патриоттық клубтың басын қосты. Олардың 100-ден астамы әскери бөлімдердің жанында орналасқан. Жалпы қамтитын бала саны 2600-ден асады. Бұған 230 000-нан астам тәрбиеленуші баланы қамтитын «Жас сарбаз» сыныптары мен «Smart Sarbaz» үйірмелері де кіреді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.