Жаңаөзен әкімдігі қалалық қоқыс полигонын кері қайтару үшін сотқа жүгінді

Жаңаөзенде шешімін таппай келген қоқыс, санитария мәселесі әкімдік тарапынан заңда белгіленген тәртіппен ​тиісті шешімін табуда, деп хабарлайды mangystaumedia.kz қала әкімдігінің баспасөз қызметіне сілтема жасап.

Нақтырақ айтқанда, жыл басынан бері ​ қала әкімінің бастамасымен Жаңаөзен қаласы және оған іргелес орналасқан ауыл-аймақтардың қоқысын шығару мен санитариялық тазалығына жауапты бірнеше серіктесіктердің келісім-шартқа сәйкес қызмет көрсету міндеттемелері сапалы әрі уақытылы ​ орындалмауына байланысты олардың басшыларымен ​ жиналыстар өткізілуде.

Сондай-ақ, ағымдағы жылдың 18 тамызы күні Маңғыстау облысы әкімінің бірінші орынбасары Б.Орынбасаровтың төрағалығымен Жаңаөзен қаласындағы тазалық мәселесіне қатысты міндеттемелерін орындамай отырған «Тазалық –С» ЖШС өкілдерінің, ​ қала әкімінің, ​ ​ азаматтық белсенділердің, Қоғамдық кеңес мүшелерінің, қалалық мәслихат депутатының қатысуымен кеңейтілген жиналыс өткізілді. Нәтижесінде ​ серіктестіктің басшылығына келісім-шарт талаптарына сәйкес міндеттерін орындау жөнінде қатаң ескерту жасалды.

Баспасөз қызметінің мәліметіне сүйенсек, қаланың тазалығына, қоқыстардың уақытылы шығарылмауына ​ қызмет көрсетуші серіктестіктердің ұжымында орын алған жұмыс беруші мен жұмысшы арасындағы еңбек қатынастарынан туындаған еңбек даулары да кері әсерін ​ тигізген. Жұмысшылардың бір айға созылған ереуілі барысында қойылған талаптарын жергілікті атқарушы органмен серіктестік басшылығымен талқылау, қарау нәтижесінде қабылданған хаттаманың кейбір тапсырмалары күні бүгінге дейін ​ «Тазалық-С» ЖШС тарапынан орындалмаған.

Әлеуметтік желідегі ​ көпшіліктің пікірлерін ескере отырып, Жаңаөзен қаласының әкімдігі​ 2019 жылдың 10 маусымында 7 жыл мерзімге келісім-шарт негізінде сатып алу құқығынсыз «Тазалық-С» ЖШС-не сенімгерлік басқаруға берілген тұрмыстық қатты қалдықтарды қайта өңдеу және көму комбинатын (полигонды) жергілікті атқарушы органның коммуналдық меншігіне қайтару үшін Маңғыстау облыстық мамандандырылған ауданаралық экономикалық сотына талап арыз түсірді.

Сот органдарының​ қабылдаған шешімі туралы алдағы уақытта БАҚ , әлеуметтік желі арқылы жаңаөзендіктер ақпараттандырылып отырмақ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.