Ақтауда 1 000-нан аса әскери қызметші жаңа мамандықтарды меңгерді

Теңіз жаяу әскерлері бригадасының қызметкерлері мамандықтар бойынша оқытуды қорытындылады, деп хабарлайды mangystaumedia.kz.

Ақтау гарнизонындағы гвардиялық бригадасының 1000-нан аса әскери қызметшісі жаңа мамандықтарды меңгерді. Осыдан бір ай бұрын басталған дәрістер қорытындыланды. 200-ге жуық нұсқаушы сабақтарды жоғары деңгейде өткізді.

Әскери қызметшілер мамандықтары бойынша қажетті дағдылар мен машықтарға үйреніп, кәсіби білімдерін жетілдірді. Сондай-ақ, жеке және топтық қаруды, қару-жарақ пен әскери техниканы шебер және тиімді қолдануға үйреніп, тәжірибелік сабақ кезінде мамандардың далалық дайындық деңгейін арттырды.

Жалпы сабақтарға 100 оқу сағаты бөлініп, аптасына 5 рет өткізілді.

Сабақта оқу-әдістемелік материалдар мен арнайы фильмдер көрсетілді. Оқытушылар қарудың және техниканың материалдық бөлігін үйретті.

– Оқу кезеңінде әскерге жаңа келгендер ант қабылдады және оларға қару-жарақ пен әскери техника бекітілді. Жеке құрам мамандық бойынша даярлықтан өтті. Оларға білікті мамандар, сержанттар мен офицерлер, яғни нұсқаушылар дәріс оқып, білгенімен бөлісті, – деді арнайы мақсаттағы барлау ротасының аға сержанты Радбек Амит.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.