«Асыл аналар» Наурыз мерекесін тойлады

Ақтауда Маңғыстау облысы дін істері басқармасының тапсырысымен, «Отпан» Ақпараттық-түсіндіру және оңалту орталығы» қоғамдық қоры мен облыстық Бекет ата мешітінің жанындағы әйел-секторының ұйымдастыруымен Наурыз мейрамына орай «Салт-дәстүр – ұлттық тәрбиенің негізі» атты іс-шара өткізілді, деп хабарлайды mangystaumedia.kz сайты қалалық Бекет ата мешітінің баспасөз қызметіне сілтеме жасап.

Мешіттің әйел жамағатына арналған шараның мақсаты - қазақ халқының әдет-ғұрпы мен салт-дәстүрлерін дәріптеу, асыл дініміздің қастерлі құндылықтарын насихаттау және халқымыздың сүйікті мейрамы - Наурызды атап өту.

⁃ Шараға "Асыл аналар" әжелер мектебінің өкілдері, "Жусан" операциясының аясында елге оралған азаматшалар және мешіт жамағаты қатысты. Дін мен дәстүрді сабақтастыра отырып, әйел жамағатына мерекелік көңіл-күй сыйлауды мақсат еттік, - дейді облыстық Бекет ата мешітінің жанындағы әйел-қыздар секторының жетекшісі Ақмарал Қазиева.

Мерекелік шараны ҚМДБ-ның Маңғыстау облысы бойынша өкіл имамы Әнуар Ізімбайұлы ашып, жиналғандарды Наурыз мерекесімен құттықтаса, "Отпан" орталығының басшысы Азамат Төлепов жамағаттың басын қосқан жиынның маңыздылығын атап өтті.

Құрылғанына 1 жыл болған «Асыл аналар» әжелер мектебінің өкілдері қазақтың "Нәрестені бесікке салу", "Тұсаукесер" сияқты рәсімдерін көрсете отырып, жастарға байырғы салт-дәстүріміздің бүгінгі өмірмен байланысын түсіндіріп, әдет-ғұрыпты қадірлеуге шақырды. Жиын соңында жиналғандарға ұйымдастырушылар тарапынан сыйлықтар ұсынылып, ұлттық тағамдардан дастархан жайылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.